SIMNA TELLO PIANTHAR A TÂWK LO VE

JOHANA 3:3
“Tihtakmeuhvin, tihtakmeuhvin ka hrilh a che, mi tu pawh an pianthar loh chuan Pathian ram an hmu thei lo vang.”

“Simna tello pianthar a tâwk lo ve,
Kraws thleng lova nun chân ten
Chhandam an hlawh si lo;
Sual haw lo mualpho hlau mai ringtu chu
Tihboralin an la awm dawn e.”

He hla mâwi tak mai, “Hmelțha” tih hla hmanga Zoram khawvêl dengchhuaktu Vanlalsailova ngêi maiin a sak han ngaihthlâk tawh hi chuan beng hi a tlâi êm êm zêl chu anih hi.

Ringtute chuan Zakaria leh a nupui Elizabeti fapa Baptistu Johana, Lal Heroda ngêi pawn mi fel leh thianghlim tak anih avânga a hlauh êm êm a kha hre lo kan awm âwm love. A pian hma ațang tawha LALPA vântirhkoh pawn, “LALPA ngaihin mi lian a ni ang a, uain leh zu rêng rêng a in lo vang,” tih hiala a lo sawi tawh mi thianghlim êm êm a ni.

Thlalêra a awm laiin Pathian thu a hnênah a lo thleng a. Tichuan, Jordan lui kam vêl ram tina kalin, thil tihsual ngaihdam nân simna baptisma thu a hril ta zêl a.

Kan sualte ngaihdam anih theih nân hian Pathian hian simna kan neih hi a phût a, amah Lal Isua, Pathian fapa ngei pawn, “Mi fel takte lam tûra lo kal ka ni lo va, mi sualte lama simtîr tûra lo kal ka ni zâwk,” ati hial a ni.

Simna hi piantharna dik taka rah chhuah tûr zînga pakhat a ni. Baptistu Johana pawn, “Chutichuan, sim hming pu tlâkin rah rawh u,” a lo ti hial bawk a ni.

Lal Isua’n lut tura min tihna, ‘Kawngka zîm,’ a kan luh hian kan tih țhinte sim a, kan tih ngai loh kan tih a țul tawh zâwk a ni. Kawngka zîm chu nunna kal kawng a ni a, a zîma, a kawng pawh a chêp bawk avângin khawvêl thil tam takte hi a leng ve lo va, mah se chatuana nunna neih theihna a ni thung.

Lal Isua vâna hruaichhoh anih hnuah ngêi pawh tirhkohte’n simna an ngaipawimawh êm êm a, Tirhkoh Petera pawn, “Sim ula, in sual ngaihdam nân Isua Krista hmingin baptisma chang țheuh rawh u; tichuan, Thlarau Thianghlim pêk hi in hmu ang,” tiin thu a lo hril ve zêl bawk a ni.

Piantharna kan chan hian kan thil sual lo tih țhinte hi tih a rem tawh lo tih hi kan hriat a va ngai tawh tak êm! Simna tel lova piangthar nge i nih, simna nêna piangthar?

1 KORINTH 6:9-11
A nih leh, mi fel lote chuan Pathian ram an luah lo vang tih in hre lo vem ni le? Bumin awm suh u; inngaih hmangte emaw, milem betute emaw, uirête emaw, mi hurte emaw, mawngkawhurte emaw, rûk hmangte emaw, mi duhâmte emaw, zu ruih hmangte emaw, mi hau hmangte emaw, hlêprute emawin Pathian ram an luah lo vang. Tin, nangni ṭhenkhat chutiang mi in nih ṭhin kha; nimahsela, Lalpa Isua Krista hmingah leh kan Pathian Thlarauvah tlen fai in ni tawh a, tihthianghlim in ni tawh a, thiam chang in ni tawh.