SAMSONA THU KHIRH : EITU ATÂ EITUR LO CHHUAK A, CHAK TAK ATÂ THILTHLUM TAK LO CHHUAK

CHAKLOHNA HI CHAKNA :

RR.14:14. Eitu ata eitur lo chhuak a, chak tak ata thil thlum tak lo chhuak...

Ezk.19:3,6. A chawm tlei e, no pakhat Sakeibaknei vânglaiah, a lo thiam e, sa seh, "Mihring a hmang chhûn râwlah".

Thup.5:5... Sakeibaknei, Juda hnam a mi, Davida Bulpui....

Samsona chu Timna khuaah a zuk kal a, Philistiaho fanute zinga hmeichhe 1 hi a zuk hmu a. Samsona chuan a pa hnênah, "Mi neih sak mai rawh, ka duh êm asin maw le" a ti a. A nu leh a pa chuan chu chu  "LALPA tih a ni" tih an hre lo va: Pathianin Philistia-ho chungah remchâng a zawng a ni si a. Hei hi Samsona tlûkna emaw an ti fo, mahse a la ni lo tihna a ni. A nu leh a pate nên chuan an zuk kal a, Timna khuaa grep huanah Sakeibakneiin a lo rum khum a, LALPA Thlarau a chungah a lo thleng a, kelno pawhsawm angin a pawtsawm ta vek mai a. "A zuk kal a" nula chu a kawm a. "A zuk kal leh a" Sakeibaknei ruang enturin a va peng a, Sakeibaknei ruangah chuan, khuaiin bu a lo nei a, a zu pawh a lo awm a. (Samsona tih sual 1 na. Lev.11:24-25,39. Sa thi ruang khawih. Timna khua a mi nula khi chu Pathian ruat)

Sakeibaknei, ramsate Lal (tih a ni ṭhin a), duham leh huamhap tak, a sa seh pawh a duh tâwka a ei hma chu hauhbet tlat ṭhin a ni a, hei hi sakei zia ve hrim hrim a ni. "Keipui sa hauh" tih ṭawngkam te pawh kan neih ve bawk kha. In khingpui Diabola chu Sakeibaknei rum ṭhin angin, a seh theih tur zawngin a phi ruai ṭhin (1Pet.5:8). Hei hi "Eitu" hmasaber chu a ni. "Mihring a hmang chhûn rawlah" (Ezk.19:3,6).

*Rûkhmang chu "Ru tur" leh "Tihlum tur" leh "Tichhe tur" lo chuan a lo kal lo.* A thil tum leh duhber chu *"Mihringte min ei zawh vek"* hi a ni. Nuho vawk vulh angin, min duat awm tak hian, a tui ṭha ṭha, a nuam leh hlimawm ber ber te, chawimawina leh ropuina te min chhawpin, chûng chuan min châwm ṭhin mahse, a tâwpa a goal chu a hnênah, *"Thihnaa"* min hruai a ni. I chanve tur ni miah lo, I chanvo, I tâ leh I kalna tur pawh ni hauh lo, *"Chatuana inhremna hmun, Meidil" chu (Mt.25:41)* I chanvo a lo nih a, chutah chuan *"I kal ve ngei ngei"* theihna turin, Chatuan hremna meidil chu *"Khilai"* phêt che hi a thil tum   a ni. *(Thuf.7:21-27). He "Eitu"* aṭang hi chuan *"Eitur tak, Vân manna"* a lo chhuak ngai dâwn lo tih a chiang si a.

*Pathian leh a Thu hian "dotu"* a nei angin, *"do"* pawh a nei a ni. Pathian chuan *"Sual chauh a do lo va,"* ama ṭhatna ni lo *"ṭha ve dang"* ama felna ni lo *"fel ve dang"* ama Thianghlimna ni lo *"thianghlim ve dang"* etc zawng zawng te hi Pathianin a duh lo va, a pawm hek lo. Setana chuan Pathian rem ruat leh a thiltih reng reng hi dâwtah, engmahlo vah chantir a tum ve tlat avângin, *"engkim"* hi Pathian tih a lo ni vek hauh lo. Engkim Pathian tih anih vekna chu hmun hran daih a ni.

*Eitu 2 na chu "Ka thinlung" hi a ni.* Nangmaha chhuak *"Mi pakhat"* LALPA kalha thilsual ngaihtuahtu, *"Suahsualna thurâwntu"* a awm *(Nah.1:11).* He Sakeibaknei koham zia hi i ngaihtuah thleng ngai em..??? Miin a kain a ṭhenawm hnênah remthu sawi mah se, *"A Thinlung ah" amah chu a Châng khiau ṭhin".* Mihring hi *Pathian Thu ei zotu, Pathian Thu "Ei zawh hmang" a ni. Ani thusawi hi chu ka ei zâwng tak, Ani thusawi hi chu ka ei lo,* ti a, mahni thinlung mil zawng lo thlang ve zut zut ṭhin kan ni a, kan intithei in, kan chapo em em a, ka duhthlanna a pawimawh, ka thu thu, mihring hi kan pawimawh tiin, kan la *"inti thu"* ve viau leh nghâl.

*Ka thinlung ka tithianghlim a, *ka Sual lakah ka thianghlim, tunge ti thei.* Thinlung hi thildang zawng zawng aiin *"Bum hmangber, Chhelailetder"* a ni a, tuinnge hrethiam thei ang *(Thuf.20:9. Jer.17:9)* Thinlung chi 2 Bible hian min hrilh tih erawh hrethiam ila. *(Thinlung thar ka pe ang... I thinlung veng tha rawh "Nunna lo chhuahna" a ni si a..etc..)* He Pathian Thu *"Ei zawh hmang, mihring thinlung"* aṭang hian eitur tak *"Vân manna"* a lo chhuak ngai dâwn lo. Thudik leh Thu ṭha tam tak chu a lo chhuak *ve* a ni mahna.... Engahnge *"I thinlungin"* a hruai bo che.. *Job.15:12.* he thinlung hi Pathian Thu chuan *"mi" (person)* angin a sawi fo ṭhin. He thinlung hi *I thluak (brain)* emaw, *I thlarau (spirit)* emaw, *i rilru/nunna (soul)* emaw, *I taksa (body)* emaw kha a ni lo tih hrethiam ta la. *I rilru leh i ngaihtuahna pawh kaihruai thei, thunun theitu a ni tih i hrethiam meuh nange ?*

*Eitu 3 na : Eitu Sakeibaknei Dik tak chu:* Sakeibaknei, Juda hnam a mi, Davida Bulpui, Davida fapa ni bawk si, *"Thu tisa lo Chang"* ngei hi a lo ni. Pathian Thu hi kan eitur ni lovin, *"Min eiraltu tur"* a lo ni zâwk. Min ei zo vektu hnên aṭang hian, kan thlarau tâna chawtak *"Ei tur tak, Vân manna"* kan lo dawng zâwk (dâwn) a lo ni.

*Keimahah hian Pathian Lalram* a lo din theih nân, ka lo neih ve sa, ka sualna zawng zawng chu a thiamloh zia hailangin, min ṭhiat ral a. *Chu mai chu a la ni lo cheu,* Keimahah hian A Lalram chu zauh zel turin, ka felna leh ka ṭhatna leh a chhûnga awm zawng zawng te chu, dimdawihna tel miah lovin, min ṭhiatin min *"Ei ral"* ta hmiah hmiah mai a nih hi. Lalpa'n ram a lak dân chu *a awm sa ṭhiat* zâwng zêlin a lo ni, thlai chi thar, *"Vân manna"* a rawn tuh theih nan. *Hei hi chu "lei zion" lam ni lovin, mihring chhunga Pathian Lalram din thu a ni. Lei Jerusalem tundin lam thu hla ni lovin.*

Mâwmbati hi a eng kan chhawr ṭangkai theihna tur chuan, a mâwm, a sathau lam kha a ral zêl a ngai angin, *"I êng Krista"* a lo en chhuah theihna tur chuan a mâwm, a sathau lam hi kan *"kan ral zêl"* a lo ngai a nih hi... Nangmah ber I ral zêl chuan, hliahtu nei lovin, *I êng Krista* chu mathei lovin nangmahah a lo êng chhuak ang.. *i ṭankâkna tel ve miah lovin, Paula khân,* Paula khân eng chhalin nge *"Nitin ka thi (ka ral zêl) ṭhin a tih khâ.* Chutichuan lâwm êm êmin *ka chak lohna* te hi ka chhuang tawh zâwk ang... ka chakloh a piangin a ni ka chak ṭhin ni a, ti a. Keini lah chu *chak turin kan infuih tak sauh sauh va, Pathian do kan lo ni pha reng lo maw...*

*Hei hi a ni "THUTAK" chu.... Eitu ata eitur lo chhuak a, chaktak ata thil thlum  tak lo chhuak... tih hi... Amen... Halleluiah.. Rom.8:26.* Chutiang bawkin, Thlarau chuan kan chak lohnate a pui ṭhin a; engtia ṭawngṭai tur nge tih kan hre si lo va, nimahsela, Thlarau chuan rum sawi hleih theih lohvin min ṭawngṭai sak ṭhin. 

*"Tunlai chu ka rinna a chak lo, ka rinna a chau"* tih ṭawngkam hi kan hman nasat pâwl tak a ni awm e. Kan han ṭawngṭai, *"Aw Lalpa, kei mi sual hi. mi chak lo hi. Lalpa I tello chuan... nangmah I lo chêt loh chuan.. tih theih engmah ka nei lo"* kan ti hluam hluam a. Kan han *Amen* chiah a.. *"Kan ti ve thei, .... kan ti ve tur a ni, ... kan tih theihloh ti turin Pathianin min ti lo,... Pathianin mawhphurhna (responsibility) min pek chhan chu chu ti... kha ti...* kan ti leh pung pung a, kan ṭawngṭai lai leh kan Amen hnu hi a inang lo thei e... mit chhing reng a tân hian kan duhawm zâwk a ngem le..???

*Thlarau chuan kan chaklohnate engtinnge a puih,...* Pathian Thu aṭangin I lo en teh ang..

Jokoba chu Jabok lui kaiah, mi pakhatin *khawfing chah* thlengin a buan a. Tin, a hneh lo tih a inhriatin a malpui ruh chuktuahah chuan a khawih sak a, Tichuan a buan lai chuan Jakoba malpui ruh chuktuah chu a lo pelhsawlh ta a *(Gen.32:24-32).* Jakoba aṭang thei ṭa lo,... a che thei ta der lo tihah, chaka puan a ni zâwk ta tlat hi a mak hle. *"A la mak dâwn chauh leh nghal"...*

*Khawfing a lo chat a, (Pathianin khawfing chah hunah chuan a ṭanpui ang. Sam.46:5).* Penuel a pelh lai chuan ni a lo chhuak a, *(Khawvela Ka awm chhûngin khawvêl êntu Ka ni. (Jh.8:12, 9:5, 12:46)* amah chu a rawn chhun a, a malpui avâng chuan a lo bai ta a. (Ka ke min tibai ta nun tam ka neih theih nan. Eng a lo en meuh chuan thima thil awm chu fiah takin a lo lang UAR ṭhin si a. *(1Kor.4:5). Chak lohna hi chana a lo ni.*

Tin hriattirnate chu a nasat em em avânga ka inngaihhlut lutuk loh nân "tisaah hling mi pe" a ni, Setana tirhkoh, kut thak hnawih nâna mi hmangtu tur chu, chutilochuan ka inngaihlu lutuk dah ang e. *Chu mi chungchang thuah chuan, mi kian san theih nân Lalpa chu Vawi 3 ka dil a (Paula te meuh pawhin "mangang ṭawngṭai" an lo bei ve tawh a).* Nimahsela, chhânna a hmuh chu mihring lam tân chuan a beidawn thlâk hle awm e... *"Ka Khawngaihna (Krista Isua hi) I tân a tâwk (abundant) e, Ka thiltihtheihna hi "chaklohnaah" asin "tihfamkimin" a awm ni" Chutichuan, Krista thiltihtheihna chu ka chungah a awm theih nân lâwm em emin "ka chaklohnate" hi ka chhuang tawh zâwk ang.* Chang 10 na hi "tisa avânga" Paula hling pai te an ni a, nimahsela chûng hling avânga chaklohnaah chuan, *"Ka chak loh apiangin a ni ka chak ṭhin ni, a lo ti thei ta zâwk a.* Keini pawh hian kan chunga thil lo thleng te hi tisa mizia avângin, hling anga min chhuntu angin kan pai a, *"Aw Lalpa, min ti chak rawh, min thlamuan rawh,... chutin khatin min ti rawh"* kan ti reng hlawm mai a ni hi. *Mahse ani chuan kan chakna turin thildang min thlan sak si a.*

*"Thlarau chuan kan chak lohnate a pui ṭhin a"* a tih hian, *kan chak lohna tichak turin min pui lo va, kan chaklohna te chu a lo chakloh deuh deuhva, "Amah zâwk" chu kan chakna a lo nih theih nân, kan chaklohna chu chak lo zual zêl turin a pui chak lo ṭhin a lo ni zâwk.!!* Amah ngeiin kan chaklohnate a la a, kan natnate a phur a *(Is.53:4. Mt.8:17)* eng atân nge kan tih chuan.... *"tihboral atân"* a lo ni reng mai.

Thlamuang thei lova mangang ṭhin tak mai hi, "tih thlamuan" a tum lo va,thlamuang hlen thei lo a nih hriain,"Thlamuanna ka hnutchhiah a che u, keimah thlamuanna ka pe a che u, Keimahah hian in thlamuanna turin" a lo ti daih mai..!!! Keini'n keimahniah kan lo beisei a kan lo chan khiau khiau laiin, "Amahah" a lo ni... Amen...Halleluiah.  Vut hi pangpar ṭhiah a chantir lova, Vut *"aiah"* pangparthi... Lungngaihna hi hlimna hriakah chantir lovin, Lungngaihna *"aiah"* hlimna hriak... Nguina thlarau *"aiah"* fakna silhfen min pe a. Fapa tlanbo lokir leh hnênah, Puan ṭhaber, zungbun, pheikhawk te a pain a lo pe ang khân. *Mi chaklo ka nih min hailan sakin, min hriattir a, keimah lam min ti chak ta lo chuan, amah zâwk chu ka chakna ni turin ka hnênah a lo kal ta ni.* 

Mihriselte chuan Doctor an ngai lo va, mi chakte chuan an theihna an hma chhuan thin.. Kei erawhchuan Lalpa hming ka ring a, amah lovin tih theih reng ka lo nei lo. Chuvângin lâwm em em in ka chaklohnate chu ka chhuang tawh zâwk ang.... Ka chak loh apiang in ka chakna Lalpa chu ka chakna a ni si a. Sam.10:14b. Engmah ti thei lo mi chu i hnênah a inkawltir ṭhin a: Pa nei lo tanpuitu i nih ṭhin kha. Chakna (Krista) ata chak leh zualin, Zionah chuan Pathian hmaah an inlan theuh ṭhin... Amen... Halleluiah.