He thûah hian Babulon-a Juda saltângte rilru tlák hniamzia a lang chiang hle. Sam 137 ah pawh khân kan hmu a; Ezk 18.2; 37.11–14 ahte pawh kan hmu bawk. Saltàn tirh phei kha chuan hna thawh zai pawh rêl lo, nupui pasal inneih zai pawh rêl loin beidawngin an kun tlawk tlawk mai a ni tih chu Jeremian lehkha a thawn aṭang khân a hriat theih. Hetiang hian a ziah kha:
“Inte sa ula, chutah chuan chêng ula; huante siam ula, a rahte ei ula. Nupuite nei ula, fanu te, fapa te hring ula. In fapate tân nupui neihsak ula, in fanute pasal neihtîr ula, fanu fapa an hrin theih nân. Chutah chuan lo pung ula, kiam suh u” (Jer 29.6–6). RSV dah dàn hian lo dah chhuak ve ila: “Build houses and live in them; plant gardens and eat their produce. Take wives and have sons and daughters; take wives for your sons, and give your daughters in marriage, that they may bear sons and daughters; multiple there, and do not decrease.”
Babulon sala an tâng reng mai chuan an thlarau nun a vaw chau a; Pathianin ngaihsak tâwk loah ngaiin mahni inkhawngaihnain an khat a. Zàwlnei chuan an thil ngaihtuah dàn dik táwk lohzia a hrilh a. Pathian an ngaih dàn chu a tênau lutuk tih a sawi a; a chakzia leh a thiltihtheihzia chu an theihnghilh ta niin a sawi.
A thusawi vàwrtâwp chu Pathian chu chaute hnêna thiltihtheihna petu, chak lote tichaktu a nih thu hi a ni. Tleirãwl tha za rual pawh an chau thei a; tlangvâl chak vànglai pawh chauin an let dèr thei bawk. LALPA (Heb. Yahweh) ngháktute erawh chuan “an chakna chu an siam ṭha leh ang a; mupuite angin thlain an thláwk chho ang a, hah loin an tlân ang a, chau loin kêin an kal ang,” (Is 40.31). A thu hi a va mâwi tehlul êm! Ringtu nih nihlawhthlâkzia a lang chiang hle a ni.
Pathian thiltihtheihna chu chaute tân pawh a awm reng a; chakna rêng nei lote pawh a tichak thei. Pathian chu thiltihtheihna neitu ni ringawt loin chakna petu a ni. ‘LALPA nghâktute’ tiha ‘nghák’ (Heb. qâwâh) tih awmze bul chu ‘la hlûm, vêt kual’ tihna (wind/twist) a ni a; chuta ṭang chuan ‘hruizên’ leh ‘maimawm rîl’ tihna a lo piang a. Maimawm rîl chu a dam khawchhuahna atâna thil pawimawh, a chaw zawnna hmanrua a ni. ‘LALPA nghák’ tih awmzia chu ‘Amah chu nunna atâna hmang, harsatna lak ata tlàn chhuahna atân hmang’ tihna tluk a ni. Hetah hian ‘nghák’ tih hi pâwngpaw nghah tlawk tlawk (passive waiting) tihna a ni lo, châk tak leh thothãng ṭha tak, phûr taka nghâk tihna a ni; ‘tum rei rãna nghák’ tihna a ni (cf. Sam 56.1; 119.95).
Chutiang taka LALPA ngháktute chuan an nghák thlàwn ngai lo, ani chuan chakna a pe ṭhin. An chakna tihtharin a awm mai ni loin an chak lohna chu Pathian chakna chuai ve ngai loin an thleng (exchange) tihna a ni záwk. Tichuan, nun tharin an nung ta ṭhin a ni. Châng 31-ah hian LALPA (Yahweh) nghâktute awm dàn duhawm tak chu kan hmu. Mupui anga thláwk chhoin, hah loin an tlân a, chau loin kêin an kal tih a ni. Pathiana innghat tlat mite chu mupui anga thlawh delh delh châng an nei a; hah loin an tlân ṭhin bawk a; chau loin kêin an kal ang.
Hetah hian thil chhinchhiah tùr pawimawh tak kan nei. Mupui chu vànsângah an thláwk reng lo; hah loin an tlân reng bawk hek lo. An hun tam záwk chu kê-a kal nân an hmang zâwk. Ringtu nun pawh hi nuam taka thlawh reng theih a ni lo a; hah loa tlàn reng theih lah a ni bawk hek lo. Ringtu hun tam záwk hi chu kê-a kal nân hman a ni. Hlim lai hian thlawh delh delh kan chák ṭhin a; mahse chu chuan hun rei a daih lo. Harhna chan lai hian chak taka tlàn hlawk hlawk kan chák ṭhin a; mahse tlàn theih chhûng a rei lutuk ngai lo. Ringtu nun tam zâwk hi kê-a muang tê a kal bek bek a ni záwk. Hlim lo chunga nun nghet vawn tlat te, harhna chang kher loa beih hrãm hrãm hi LALPA ngháktu dik takte awm dàn tùr a ni. Kê-a kal bek bek chhûng hi kan hun tam zâwk hman dàn tûr a ni tih i hria ang u.
He thu ka ngaihtuah hian kum 1998 November 12-a Isua kraws put kawng ‘Via Dolorosa’ thui zawng ka teh kha ka hre chhuak leh ṭhin. Tlai lam dâr 4 hnu deuhah, mi veivák tlèm tawh hnûah, Isuan kraws a put ṭanna an tih biak in aṭangin Kalvari tlâng thlengin ka pên hian a teh theih ang angin ka teh a; ka teh theih chin chu ka pên khat ft 3 vêl zêlin pên 1072 (ft 3216) a ni. Chumi ṭuma ka thil hriat thar chu a taka Isuan kraws kawng a zawhnaah hian a thui ber, 65% aia thui mah chu kawng chho hlîr a ni. Kawng phei tãwi tê a awm a, kawng chhuk thui vak lo a awm bawk a; a bák zawng chu kawng chho hlîr a ni.
Chutiang chu Isua hniak hnunga kan zui dàn tûrah ngai ila; ringtu nunah hian hlimna/harhna hian a daih rei lêm lo; a harh reng theih loh a, a hlim reng theih bawk hek lo. Harh lo chunga Isua zuitu nih dàn, hlim lo chunga ringtu nih zêl dàn hi kan zir a ngai. Kan hun tam záwk hi chu kawng chho kal nàn kan hmang a nih pawhin i zãm lo ang u. LALPA nghák fan fantu i ni zêl ang u.
Ka blog min lo subscribe in min lo share sak ve dawnnia, enjoy.
Comments
Post a Comment