Piantharna hi vawikhat chauh chan thil a ni a, kan hriat thiam dan tur chuan naute hi vawihnih vawithum an rawn piang nawn thei lo. Vawikhat an pianga an thih thlengin mihring an nih ang hian piantharna pawh hi vawikhat chauh thil thleng niin, kan thih thleng/ van kai thlenga daih a ni.
Mahse tunlai ringtu inti karah hi chuan vawi5 piangthar nawn te kan awm thin a, kha kha pianthar awmzia kan hriat loh vang zawk a ni. Piangthar awmzia hi nun inhlanna emaw, thil tih thin simna emaw kan tih fo avanga thar nawn sek theih anga ngai kan ni. Camp kan luta Pathian thu ah kan tui thara, kan thiltih thinte kan ti tawh lo va, piangthar emaw kan in ti a, ka thar tun tum chu tiin, mahse a lo rei a, kan tih ngai kan ti leh a, tunlai chu ka thar leh tawh lo, kan ti leh a, camp emaw kan lut leh a, kan inhlan thar leh a, ka thar leh tawh (tum hnihna), kan ti a, kan thar nawn sek mai a ni. Naute hi piangnawn sek mai se kan hlau awm!! Ramhuai a nih hi kan ti a nga, kan vawhlum daih tawh ang chu.
Kan Bible chuan mi tupawh Kristaa a awm chuan thil siamthar a ni,(2Kor.5:17) a lo ti a. Nang leh kei hi Kristaah kan awm phawt chuan mithar/ piangthar kan ni tih na a ni. Mahse engtin nge Kristaah chuan kan awm ang? Kan han lut tawp dawn em ni? Nih loh leh thil tha kan ti a nga, kan nun kan inhlan dawn em ni? Teuh suh e, chutiang atangin Kristaah a awm theih loh. A nih leh eng tin nge ni ta ang? 1Kor.1:30 ah chuan, " nangni erawh chu Pathian zarah Krista Isuaah in awm a ni", min ti a nih zawk kha. Hetah hian " In tih fel a zarah emaw, in inhlan a zarah", a ti lo. " Pathian zarah", a ti a ni. Unau, voin ah hian nang leh kei hi Pathianin Kristaah min dah daih tawh zawk a lo ni (Kol.3:3). Va indah tum vak lam a kawk lo va, Pathian min dah tawhna hi lo AMEN mai tur a ni.
Chutichuan Kristaah awm kan nih tawh avangin, nang leh kei chu Pathian hmuhah mithar/ piangthar/ thil siamthar chu kan lo ni tawh ta zawk a ni. Chi chhethei tawh lo va hrin/ van lam hrin kan lo ni tawh ta zawk a ni. Chu chu a ni pianthar awmzia zawk chu ni. Inhlanna kha piantharna a ni hauh lo tih na a ni.
Mi a lo pianthar hian sual an nei tawh lo emaw an in ti fo va, tha tluang parh tur emaw te kan in ti a, mahse a nih loh zia chu kan Bible in min hrilh a ni. 1John.1:8 Sual ka nei lo kan tih chuan mahni leh mahni kan in bum a ni, min ti. Pathianin sual hi a thah mio loh avangin mihringah hian kan la nei reng a ni. Engtik lai pawha thil sual la ti thei reng kan ni. Mahse piangthar tawhah chuan Pathian Thlarau Thianghlim kawl tawh kan nih avangin sual lo thei kan ni ta thung a ni.
Kan nitin nunah tisa dan leh Thlarau dan zawh thei reng kan ni a, Pathian thu lam ngaihsak hman lo va kan awm hnem hian kan nun a chau va, sual lamah kan chak tulh2 thung a ni. Entirnan sawi ila, keimah niah hian Uidum leh ui var hi a awm a, ui dum i chawm that poh leh a chak a nga, ui var i chawm that poh leh uidum aiin a chak zawk ang. Chutiang bawkin uidum lam kan chawm that lutuk hian keimah niah thil sualte kan lo ti nasa a, kan chhunga awm Pathian Thlarau kha a chau tulh2 in hna thawk theilovin kan siam ta a ni. Khatianga kan awm reng avang khan Setanan rem changah la in, piangthar lo anga in hriatna min in neih tir a, in rinhlelh na in kan khat ta tlat thung a ni. Ka piangthar ve tawh si a, ti nge he tianga ka awm? Kei hi ka thar tak2 lo a ni lo maw? Ti nge thil sual hlir ka ngaihtuah? Tiangte chuan vanram ka kai ve thei dawn a mi? tih thlengin ngaihtuahna chi hrang2 min neih tir thin.
Piangthar lo ang hialin min in hriat tir thin. Kha kha i piangthar lo a ni lo va, i nitin nuna Thlarau lam chaw ei lo leh tisa duhna i zui zawk fo vang a ni.
Piantharna chu vawikhat kha chatuan atan a ni. In ringhlel tura siamtu che kha Setana a ni a, i thil tih sualthinte hmang tangkaiin i chhia leh tha hriatna hmangin thiam loh a in chantir ve ngawt che a ni. I piangthar lo a ni lo va, tisa duhna i zui zawk fo avanga nangmaha Setana hnathoh thleng zawk chu a ni.
Pathianah chuan Kristaah mi thar/piangthar i ni reng, a danglam ve ngai lo. Nangmah i danglam fo avang khan Pathian lama i nihna a danglam pha ve tawh lo. Mahse Thlarau lam aia tisa lam i zui zel chuan nun khawro tak leh buai leh hreawm takin i awm reng ang.
I tana chaw tha ber leh hlimna chu Thlarau lam thil Pathian thu hi a ni. I nun suala a tluk taka vang khan i piangthar lo a ni lo. Sual la nei reng kan nih zawk avang leh Thlarau lam thil kan ei loh fo vang zawka Setana bumna zawk a ni. I nunna chu Kristaah thuhruk a ni reng tawh zawk a, i piangthar lo a ni lo. Lalpa hmel ti mawitu ringtu hrisel kan nih theuh theih nan Lalpan mal min sawm vek rawh se. Amen.
Ka blog min lo subscribe in min lo share sak ve dawnnia, enjoy.
A va fiah chiang tak em.a lawmawm ka ti takzet ani.
ReplyDelete