NGAIHDAMNA

Ngaihdamna hi thil pawimawh berte zinga mi a ni awm e. Pathian leh mihring inkarah a pawimawh ang bawkin, mihring leh mihring inkarah pawh a pawimawh a. Chhungkuaah pawh sengluh a nih loh chuan, inmihranna bak hmabak a awm thei lo. Ngaihdamna tel lovin ‘Pathian mi’ a nih theih lo va, Ngaihdamna tel lovin chhungkua a khawsakho theih bawk hek lo. 

Kohhranhovah ngei pawh hian ngaihdamna tel lo chuan rawng a bawl ho hleih theih loh a ni.  
 

Ngaihdamna chungchang hi Bible-ah eng ang takin nge hman a nih a, eng ang taka hmun pawimawh luah nge a nih i lo en ho teh ang. Thlahtu Evi leh Adama te’n thil an tihsual lai khan ngaihdamna hi chelek a nih awm reng reng a lang rih lo va. “In ei chuan in thi ang, a tawh pawh in tawk tur a ni lo” tih a ni. A nih ang taka hman a nih chuan khawvel hian a dawl zo lova , ‘Bawhchhiatna fa’ kan lo nih phah zo ta a ni. Ngaihdamna chelek a nih loh avangin khawvel leh a chhunga awm zawng zawng te pawh chu Pathian anchhedawng kan lo ni zo ta a. Natna te, hlauhna te, tlakchhamna te, tahna te leh thihna te chu kan chanpuala lum a lo ni ta. Amaherawhchu, Ngaihdamna hi chelek rih lo mahse, Khawngaihna lantir a ni thung a ni. Khawngaihna phei chu hmang lo se Pathian khan Adama te nupa kha tihlumin, a duh phawt chuan vaivut kha mihring dangah a din leh mai thei a ni. Adama te hun a liam a, mihringte chuan Pathian thu an âwih leh ta lova. Hurna leh khâwlohna leh inpawngnêkna in khawvel chu a lo khat leh zo ta a. Ngaihdamna an chan mai si loh avangin tuilêt rapthlak eltiang mai chu Nova hun lai khan a thleng leh ta a nih kha. Ngaihdamna tel lo chuan mihring tan pawh, ran tan pawh nun rual a ni lo. Zawlnei ropui Mosia te, Puithiam hmasaber leh ropui tak Arona te meuh pawh, Massa leh Meriba hmuna Lalpa an chawimawi loh avangin Ramtiam - Kanan thleng zo lovin an boral ve leh ta a nih kha.

Ngaihdamna awmlohna hmun chu hmun tihbaiawm leh ralti a ni a, lungmuanna leh hlimna tak tak a awm thei ngai lova, Zawlnei ropui te meuh pawh an nun khawchhuah theih lohna hmun a ni. Israel Lal ropui Davida ngei pawh Pathianin ‘Ka rilru ang pu mi’ ti a duhsak taka Israel te lala a siam ni mahse, Pathianin a remtih loh chung pawhin a mite a chhiar a, sipai chakna leh ralthuamte a chapopui takah kha chuan Pathian hremna hmachhawn tur rapthlâk tak tak chi thum zet a hmaah chhawp chhuah a ni ta mai a nih kha! Keini Thangtharte hi thlahtute leh Lalpa Zawlnei ropuite ai khian kan fel bik em? An bawhchhiatna leh sualna angte khi ti ve lovin kan insum thei bik em le? Thei bik teh suh e. Pathian khawngaihna leh chhandamna te hrereng chunga awih duh lo leh bawhchhe thin, luhlûlnaa khatte kan ni. Chuti engtin nge kan tih tak ang? Lalpa Isuan heti hian a ti, “Mi an bawhchhiatte in ngaihdam chuan, in Pa vana miin a ngaidam ve ang che u. Nimahsela, mite in ngaihdam si loh chuan, in Pa in in bawhchhiatte a ngaidam bik lovang.”  tiin.
 

Kan sualna leh bawhchhiatna tinrengte hi ngaihdam a nih theih nan \huthluang chunga lo nghah ngawt chi a ni lova, kan chunga thil tisualtute ngaidam thei hawt si lova Pathian ngaihdamna beisei ve ngawt chi lah a ni bawk hek lo. Mahni ngei chêt hmasak a tul a ni tih Pathianthu chuan min hrilh a ni. “Inkhawngaih tawna lainatna neiin awm ula, Pathianin Kristaa a ngaidam che u ang bawk i nin ngaihdam tawn rawh u.” (Ephesi 4:32) “Kan sualte thupha kan châwi chuan kan sualte ngaidam tur leh kan fel lohna zawng zawng tlengfai turin amah chu a rinawmin a fel a ni.” (I Johana 1:9) a ti leh bawk a.

Tichuan, kan sualna leh bawh chhiatna tinrenga ngaihdam kan nih theih nan kan tihtur Bible in min hrilh ang hian ti ila, Ngaihdamna famkim Lalpa Isua avang chuan kan chang ngei ang.

Ka blog min lo subscribe in min lo share sak ve dawnnia, enjoy.