SIMNA DIK

SIMNA DIK

      Chuta chinah chuan Isuan, "Sim rawh u! van ram a hnai tawh e," tiin a hril tan ta a.

          Matthaia 4:17.

       Sual man chu thihna, chatuan boralna a nih avangin sual sim hi Pathian ngaih pawimawh berte zinga mi a ni a, Lal Isua ringtute chuan vanram kai kan duh chuan sual simna nung chu kan nei ngei ngei tur a ni. Hremhmun hrehawm zia hi Lal Isuan a hriat chian em avang leh chu ta kan kal chu a hlauh ngawih ngawih avangin sim turin min duh a ni!  Kan Bibleah hian sual pawizia, a nghawng chhiatzia leh hlawkna a neih lohzia a tarlan chu hmun tam takah kan hmu thei (Rom 6:23).etc. Billy Graham a pawhin khawvel thil hlauhawm ber zingah sual hi a lo chhal nghe nghe a ni. Tirhkoh Paula te, Lal Isua te khan sual an duh lohzia kan hre bawk. Sualna hi mimal, chhungkua, khawtlang, ram leh hnam hmelma, lungngaihna leh chhiatna hrang hrang min thlentu a ni.*

       *Simna chu Grik tawngin ' metanoia' tih a ni a, a awmzia chu 'rilru, thinlung thlak thleng' tihna a ni thei ve ve awm e. Kan mihring hlui Adama thinlung ang pu, dehkhirh tak, luhlul, thu awih lo tak chu kan mihring thar Krista thinlung ang, rilru thara kan thlak thleng a ngai a ni. Thil sual  kan hriat, sim kan duh em em a awm ngei ang, chungte chu sim tumin hun engemaw chhung chu kan han ti lo ve thin a, mahse, hun lokal zelin, kan insum peih loh hunah kan ti leh mai a, chutiang chuan kan tih chhawk kual vel thin a ni. Hetiang hi chuan simna  tak neih a har hle ang.*

       *Hun hnuhnung thil thleng tura William Booth-in a lo sawi lawk pakhat chu 'simna tello piantharna' hi a ni. Kan ram ringtu nun tlo theih lohna chhan bulpui ber nia lang chu sual sim kan harsat em em mai hi a ni kan ti thei ang. Chuvangin, sual hi ringtu ten kan hmelma lian ber pakhat ni tina kan tawh thin a nih avangin, simna chu kan mamawh berte zinga mi a ni. Vantirhkohte meuh pawhin thil an tihsual khan Pathianin a zuah lo va, hremhmunah a paih tih kan hria (ll Petera 2:4). Kan ringtu nun, rawngbawlna leh kohhrana kan chet velna leh nun kawng tinrengah hian sual sim lo kan tam anih chuan Pathian ram kan zauh mawh khawp ang a, kan nun a hlim lo vang, a thlamuang bawk lo vang a,mite tan thlarau malsawmna kan ni thei lo vang a, vanram kan thleng thei lo vang tih hi thil hlauhawm ber a ni!*

       *Simna tak tak, sual simna nung nei tur chuan keimahniah hian Krista a nun a ngai. Tirhkoh ropui ber Paulan, "Krista hnenah khenbehin ka awm ta;  nimahsela, ka nung a ni; keimah erawh chu ka ni tawh lo, Krista chu keimahah a nung tawh zawk a ni" a tih kan hmu (Galatia 2:20). Hetiang nun a lo neih theih na nia lang chu, Evi leh Adama sual thlah fa hremhmun kal mai tawh tur ni si, vanram kai  zawk tura Lal Isuan thihna tuara a chhandamna kha pawm tlat in, sual sim zelin,a tan inpumpekin, Thlarau Thianghlim, Lal Isua Thlarau amahah lo lutin, simna nung neiin,a theih loh thin te pawh chu a lo thei ta a ni. Keini pawh Paula ang hian Pathian Thlarau zarah Lal Isua chu kan Lal ah leh Chhandamtua kan lo pawm a, chumi zara sual simna kan lo chan a, keimahniah Pathian Thlarau Thianghlim a lo awm a, a lo chenin, sual huatna, sual pawizia, hlauhawm zia, hremhmun kawng a nihzia hriain, sual simna nung chu kan lo nei thin a ni. Sual simna tak, simna nung kan Pathian thuin a sawi chu khitiang nun neitute khi niin an ni.*

       *Lal Isua ringtu dik tak ah chuan  Pathian chi a awm a, chuvangin thil a tisual thin lo a ni; Pathian hrin a nih avangin thil a tisual thei hek lo (l Johana 3:3:9)  Chuvangin, simna dik tak kan neih theihna chhan chu Pathianin a khawngaihna a, a Fapa hmanga min rawn tlanna leh thlanna chu lo pawm a, a hnena inpumpek a, simna nunga sim zel a, a Thlarau Thianghlim kan lo neihna avanga lo awm a ni e. Pathianin a thute mal min sawm theuh rawh se, Amen.