KOHHRAN PASARIH CHANCHIN CHHUNZAWMNASARDIS KOHHRAN 1

                      (Thup. 3:1-6)

A hming awmzia hi "A la bang" emaw "Thilthar" emaw "Hlimna hla" emaw tihna a ni. He kohhran hian AD 1517-1755 chhung a Pathian kohhran a entir a ni.

SARDIS KHAW CHANCHIN TAWI:

Sardis khua hi Isua pianhma kum zabi 12-na vela lo din tawh a ni a.

BC 1150 velah khan 'hma asawnin' a lo chak ta em em mai a.

Tichuan, Lydia lalram khawpui ber a lo ni ta a ni.

Thuatira chhim chhak mel 35 vela hlaa awm a ni a, ft. 15000 asang tlang chunga awm a ni.

Khawpui luhna (Gate) pakhat chauh a neih avangin awlsam tein an veng thei a ni.

Nimahse, Saddis lal Croesus a lal laiin, BC 549 ah Persia lal Kuran a rawn la daih mai a ni.

Kura sipai țhenkhat zanah kawngkhar (Gate) vengtute mutthilh laiin an lut a, an la thei ta a ni.

Chutiang chiah chuan BC 213-ah Greek lal Antiochus an a rawn la leh a ni.

Sardis khaw dinhmun hi a tir lamah chuan duhawm hle mahse, vengtute rinawm lohna leh inthlahdah avangin a hun hnuhnung lama a dinhmun chu a duhawm lo hle a ni.

Khaw ropui tak ni țhin chu a lo ram zo ta a ni.

Johanan Thupuan bu a ziah lai pawh hian, Sardis mite chuan, tunhmaa a ropuizia leh mawizia bak sawi tur an nei tawh lo.

Chu chu a ni, thi reng si nung hming a putna chu ni.

SARDIS KOHHRAN

Sardis Kohhran dinhmun hi chu Smurna Kohhran nen a inletling hlauh a ni.

Smurna Kohhran kha chu thi anga lang nimahse nung si a ni a.

Sardis Kohhran ve thung chu nung anga lang nimahse thi si a ni thung.

Sardis Kohhran hian Zalenna tur thiltih țhat a nei tlem hle a.

A thil hriat sa leh dawnsa te pawh a hre reng tawh lo.

Thuatira Kohhran hunah khan Kohhran siamțhatna a in țan tawh a, Sardis hunah hian chhunzawmzel a ni.

Rom Kohhran kalsualna dona kha a tirah chuan vung ve hle mahse, zawi zawiin a nep chho tial tial a ni.

Nimahse mi tlemte an silhfente tibawlhhlawh lo, rinawm taka Rom Kohhran zirtirna do tlattute an awm thu Isuan A sawi.

Chung mite chu a la bang Kohhran tia kohte chu an ni.

Vawin ni a Protestant Kohhran ni a inchhalte hian Rom Kohhran zirtirna dik lo kan Protest (dona) ah hian kan inbihchian a țul tak zet a ni.

Rom Kohhran zirtirna diklo siamțhat hna thawka lo dotu Martin Luther-a leh a țhiante hma lakdan leh zirtirnate leh vawiin ni a Protestant Kohhran tia inchhal ve Kohhran tam zawkte ngaihdan leh kalphung hi chu an inmil lo hle a ni.

Dodalna leh tihduhdahna karah pawh rinawm taka Isua hniakhnung zuitu a la bang Kohhrante hnenah hian thutiam duhawm tak Isua'n A pe a :

(1) Puanvar sintir a ni ang.

(2) Nunna bu ata an hming thaibo a ni lovang.

(3) Krista'n A Pa hnenah leh Vantirhkohte hmaah an hming A țan ang.

PHILADELPHIA KOHHRAN

(Thup. 3:7-13)

A hming awmzia hi "Unau hmangaihna" a ni a.

He kohhran hian AD 1755-1844 chhunga Pathian kohhrante a entir a ni.

PHILADELPHIA KHAW CHANCHIN TAWI:

Philadelphia khua hi BC 150 bawrvvelah Lal Attalus II a lal lai a din a ni a, a hming pawh hi a unaupa Eumenes II chunga rinawmna chawimawi nana a sak a ni.

He khua hi AD 17 ah khan Lirngingin a tichhe vek a, nimahse Rom Lal Tiberius an a sa țha leh a, chuvangin amah chawimawi nan a hming pawh hi Neo Kaisara tiin a thlak a, chutiang chuan he khaw hming hi vawi enge maw zat thlak a ni tawh.

Tuna a hming chu Alashehir tih a ni a, Pathian khawpui tihna a ni.

Philadelphia khuaah hian Tirhkoh hun ațang chauh khan Kristiante an lut a, chumi hma chuan he khua hian Kristiannaah chanchin sawi tur a nei lo. Tichuan hun a lo kal zela Philadelphia chu Bishop țhut hmun pawimawh tak a lo ni ta a.

Kum zabi 13th naah phei chuan Lydia ram pum puia Kristian te hmun pawimawh ber a lo ni ta hial a ni.

AD 1390 ah Turks (Ottoman) hoin an run a, chumi țum chuan an tlawm a, Turka ho kutah an inpe ta a ni.

Nimahse, chutiang vanduainate chuan an Kristianna a tichhe chuang lova, Smurna khua ang khan Kristian te khawpui a la ni tho a ni.

Indopui pakhatna hun lai pawh khan mipui tam zawk chu Kristian an la ni a.

Kum 1923 ah erawh kha chuan Turks hovin an hnawt chhuak ta a ni.

Tunah chuan Kristiante Biakin leh dar ri hmuh leh hriat tur a awm tawh lova, Mosolmanho Temple leh dar riin a luah khat zo tawh a ni.

PHILADELPHA KOHHRAN

He kohhran hian AD 1755-1844 chhunga Pathian nung kohhran a entir kan tih tawh kha. A hming awmzia pawh "Unau hmangaihna" a ni a.

Hemi hun chhunga Pathian nung kohhrante pawhin unaute (mahni mihringpuite) hmangaihna an nei nasa em em mai a ni.

He kohhran hun chhung hian thil ropui tak pahnih, politic lama inher danglamna a thleng a Kum 1776 ah America ramah, tin, kum 1789 ah France ramah.

Heng thil thleng pahnih te hian khawvel mipuite ngaihtuahna nasa takin a ti danglam a ni.

"Isuan "I hmaah kawngka ka hawng e" ti a A sawi ang khan, khawvel chu chanchin țha atan alo inhawng thut mai a ni.

Khawvel hmun hrang hrangah missionary te chu tirh chhuah an lo ni ta a ni.

Kum 1793 khan William Carey chu Indiaah tirh chhuah an lo ni ta a ni.

Kum 1807-ah Robert Morrison chu Chinaah a kal a. Kum 1817 ah Robert Moffat chu Africa ramah, chu rawngbawlna chu David Living Stone an kum 1841 ah khan a chhunzawmpui a ni.

Chungbakah chuan kum 1804 ah British Foreign Bible Society din a ni a, tin kum 1816 ah America Bible Society din a ni leh a ni.

TUMA KHAR LOG TURA HAWNGA, TUMA HAWN LOH TURA KHAR (Thup. 3:7).

AD 1844 hi Philadelphia kohhran hun tawp kum leh Daniela 7:10; Thupuan 14:6-a rorelna ințan kum a ni.

Lei Biakbukah khan pindan pahnih a awm a,pindan pakhatna chu hmunthianghlim tia koh a ni a, chutah chuan sual tana ni tin rawngbawlna an nei țhin a, pindan pahnihna chu hmun thianghlim ber tia koh a ni a, chutah erawh chuan, kum khatah vawikhat chauh rawngbawlna an nei țhin a, chu rawngbawlna chu Tlanna ni emaw, rorelna ni emaw an ti.

Chu chu Van Biakbuk rawngbawlna entirtu, hlimthla rawngbawlna a ni.

Isua Krista chu kan tan puithiam Lalber niin Van Biakbukah Sawipuitu hna A thawk a. A rawngbawlna pindan pakhatna, hmun thianghlim chu kharin, hmun thianghlim ber rawngbawlna kawngkhar chu kum 1844 ah khan A hawng țan ta a ni. Chu chu Rorelna pathum zinga hmasa ber van biakbuk a ințan chu a ni.

Isua'n tuma hawn loh turin pindan pakhatna rawngbawlna chu A khar a, tuma khar theih loh turin pindan pahnihna hmun thianghlim ber rawngbawlna chu A hawng a ni.

He rawngbawlna hi tuman an tibuai theiin an ti tawp thei lo. (Chhiar tur: Heb. 4:14,15; 8:1,2,6; 9:1,6,7, Ex. 25:8,9; Dan. 8:11, 14 GC 430,431,435;EW. 42)

THUTIAM.

(1) Pathian Biak inah chuan banah ka siam ang.

Hei hi Pathian nung kohhrana mi pawimawh dinhmun a sawina a ni.

(2) Anmahniah chuan ka Pathian hming nen ka Pathian khua, Jerusalem Thar hming nen, ka hming thar nen ka ziak ang.

Hei hi Pathian nungchang ang an neih tawh ang. Amah ang tura siam thar lehna famkim an nei tawh ang tihna a ni a.

Tin, khawpui thar, Jerusalem a chen theihna an nei tawh ang a , Krista nungchang leh neitu A nihna chan ang an chang ve tawh dawn a ni tihna a ni.

NOTE

Setana inkhawmna in ho zinga mi Juda tak nilova dawt sawi Juda intite zinga mi chu ka tir dawn a ni; ngai teh i ke bulah chibai ka rawn buktir ang che (Thup. 3:9)

He chang hian Philadelphia khua Juda mite Kristian sakhua rawn vuantute a kawk a, chu chuan Philadelphia kohhran hun chhunga thutak hnawla, Kristiante dodaltuten an dik lohnate puanga, Kristian sakhua an rawn vawnna kha a entir bawk a ni.

LAODIKEI KOHHRAN

(Thup. 3:14-23):

A hming awmzia hi "Mipuite Rorelna" emaw "Mifel te" emaw "Rorel a awm mipuite" emaw tihna a ni. He kohhran hian AD 1844 ațanga Isua lokal lehna thlenga Pathian kohhran te a entir a ni.

LAODIKEI KHAW CHANCHIN TAWI:

He khua hi Philadelphia chhimchhak lam mel 50 vela hlaah a awm a, chu chu Kolosa khua ațanga mel 6 vel leka hla a ni. Antiochus II niin BC. 261 - 246 khan a din a ni a, a hming pawh hi a nupui Laodice-i hming chawia sak a ni.

Laodikei khua hi khawpui pawimawh tak pahnihin a tan tlanga, khawpui hausa tak, sumdawnna hmunpui, Bank awmna leh pawisa thlengna hmun leh thil siam chhuahna hmunpui a ni.

Sahmul dum puan man tam tak tak te an siam chhuak a.

Tin, lo leh huan țha tak takin a hual khat tlat bawk , Tin, Tui inbualna atana lum nuam tawk tak, sih ațanga lo chhuak tui kawng, siam chawpa luantir a awm bawk a, chu chuan Asia leh Europe ram mite a hipin an tlawh chur chur phah a ni.

Damdawi lam zirna, Karu temple a awm bawka, chutah chuan mit lam damdawi special siam chhuahna a awm bawk. Chu chu Collyrium an ti a, Phrugia lung chi khat ațanga siam a ni. Chu damdawi phei chu Greek ho zingah an hmang lar em em mai a ni.

He khua hi, chutiang taka a hausak avang chuan a chapo em em mai bawk a ni.

LAODIKEI KOHHRAN:

He khua a kohhran memberte pawh hi Khuaa mi dangte ang bawka induh tak leh chapo tak an ni a, chu chu an demawmna a ni.

Laodikei kohhran hi Isuan A fakna thu pakhat mah kan hmu lo a ni. A nihna Isuan a tarlan danah pawh hian lum silo, vawt silo, lum chang chang, sih sa ațanga lo luang chhuak Laodikei khua a thlen hun a, lum chang chang ta ang kha a ni A ti a, chu chu thlarau lama an dinhmun awm dan, Pathian huatzawng tak chu a ni.

Lum hian Pathian tana țhahnemngaihna leh veina tak tak a entir a. Tin, vawt pawh hi lum chang chang aiin a duhawm zawk a.

A chhan chu Isua pawh hian lum emaw vawh emaw A duh thu A sawi a, chu chuan vawt hi a hnawl mai lo a ni tih a tilang.

Vawt hian tling intih lohna leh thil țha zawk beisei duhna a kawk a ni.

Hetiang mite tan hian beiseina a la awm tihna a ni.

Miin tlakchham nei nia a in hriat chuan chu mi nei tur chuan theihtawp a chhuah țhin. Chutiang mi chu a vawt reng lovang. Lum chang chang erawh chuan mahni chanvoa lungawi tawkna leh engmah tlakchham nei lova inngaihna a entir a. Mahni inphata Kross put duhna thinlung an nei lo.

Heng mite hi A ka ațanga chhak chhuah turte chu an ni.

An sim loh chuan chatuan atana hnawlna an chang ang.

Laodikei thu chah hi Kristiana inchhal tawh phawt te tan a vuah theih a ni (6T.77).

Mahni nihna a lungawi tawk maite zilhhauna leh thinlung zawng zawnga Krista nungchang famkim nei tura fuihna a ni.

LAODIKEI KOHHRAN HNENA FUIHNA

Isuan, Laodikei kohhran hi a lo hausak leh theihna turin A hnen ami thil pathum lei turin A rawn a.

Chung thil pathumte chu Rangkachak te, Puanvar te, Mitna hlo ye an ni.

He fuihna leh thurawn pawihmawh tak mai pawmna tel lo chuan Laodikei kohhran hi Kristian dik tak dinhmunah a inhlang kai thei lo a ni.

Heng thil pathum, Kristan lei tura A tih hian man an nei tihna a ni lo, chhandamna chu a thlawn a thilpek a ni.

Kan lo hausak theihna tur leh tihdama kan awm theihna tura a duh apiang tana thilthlawnpek, man pe lova lei theih a ni (Isaia 55:1).

Rangkachak

Rangkachak hian "Rinna" Thlarau lam hausakna a entir a.

Chubakah Rinna diktak hmangaihna avanga thil țha tih tel a entir bawk (Gal. 5:6; I Tim. 6:18;; COL.158).

Chumi rinna lo chuan tuman chhandamna an chang thei lo (Heb. 11:6; Eph. 2:8).

He rinna hi Thlarau lam hausakna bul țhut chu a ni a, rangkachak mei a an rawh thianghlim țhin angin, kan rinna pawh hi harsatna te leh buainate hmanga tih thianghlim a ni țhin (Job. 23:10; Jok. 1:2-5).

PUANVAR:

Puanvar hian Krista felna a entir a (Gal. 3:27; Mat. 22:11; 4T. 88).

Hei hian hman laia Laodikei khawpui, sahmul dum puan avanga a hmingthanna leh chapona a hai lang

MITTNA HLO:

Hei hian Thlarau Thianghlim hnathawh a entir a:

Hmanlai Laodikei khawpui khan mitna hlo an siam chhuak țhin kan tih tawh kha.

He Thlarau lam Laodikei kohhran huna mite hian kan thlarau lam mitdelna atan tihdam kan nih theihna turin mitna hlo (Thlarau Thianghlim) hnathawh lei turin min rawn a ni. (Johana 16:8-11)

Thlarau Thianghlimin khawngaihna a A hnathawh, a dik leh a dik lo (chhia leh țha hriat theihna) min pe țhin (Johana 14:26;16:13, 4T. 88).

ZILHNA LEH THUTIAM:

Laodikei kohhran hian beiseina an la nei thei a ni tih Isuan A zilhhauhna ațang hian kan hre thei.

Lalpa chuan A hmangaih apiangte chu A zilhhau țhin (Thup. 3:12; Heb. 12:8).

Laodikei kohhran hian, a kohhranpui unau dangte ang khan tihduhdahna pawh ala tawk rih lova, nimahse tuna a dinhmun anga, thinlung zatve chauhva Krista chu a vawna, a damna tura thununna a pawm loh chuan, tuna a dinhmun hi a chhunzawm zel thei lo a ni tiin vaukhanna A pe a ni.

Chuvangin a sual tawhnate avanga lungngai leh in chhirin, țhahnemngai tak chunga a hmalam hun tur chu thlir tawh turin Kristan A duh a ni.

KRISTAN KAWNGKHAR A KIK

(Thup. 3:20):

Heta kawngkhar a tih hi, kan thinlung duh thlanna hi a ni a, mihring nunna atana kawngkhar a ni.

Mitin thinlung kawngkhar hi a kik vek a, a chhan chu A man min hmangaih hmasak avang leh boralte zawng tura lokal A nih vang a ni. (Luka 19:10; I Johana 4:19).

A aw hriat rik ngawt hi a tawk lova, a luh theihna turin kan thinlung kawngkhar kan hawn sak a ngai a ni.

THUTIAM:

A hnehtu apiang ka Lalțhutphahah ka hnenah ka țhut tir ang.

Ka blog min lo subscribe in min lo share sak ve dawnnia, enjoy.