Isua Krista chu

(Thupuan 1:4-6):

Thupuan buin a sawi tum bulpui ber leh thulaimu chu Isua Krista chanchin hi a ni a.

Thup 1:4-6 ah hian Johana hian tawi fel takin Isua nihna a tarlang a, mahse hengte hian thu tam tak leh thuk takin an sawi a ni.

Krista nihna a tarlante hi tawite tein han hrilh fiah ila:

1. THUHRETU RINAWM TAK:

Isua Krista hi Pathian nungchang leh rilru leh duhdante, mihring te hnena puang tura palai famkim A ni a (Johana 1:1,14).

Mihring zinga A awm laia sualna nei miah lova A nunna leh thi tura A inhlanna khan Pathian Thianghlimna leh hmangaihna thuhretu rinawm Anih a tarlang (Johana 14:10; 3:6).

2. MITTHI ZING ATA PIANG HMASA BER:

Thihna ata Isua A thawhleh hma kum sangkhat leh zanga laiah khan Mosia chu kaihthawhin a awma.

Chubakah zawlnei Elisa pawh Sunem nu fapa thi a kaitho tih leh Moab mi pakhat thi, Elisa thlanah an thlak a, Elisa ruhte a zuk deh ve leh, mithi chu a lo nung leh tihte Bible-ah kan hmu a (Lalte 4:18-25; 13:20-21).

Amah Isua ngei pawhin A thih hmain Lazara A kaitho a nih kha. Anih leh engatinge Thupuanah hian mitthi zing ata tho hmasa ber (piang hmasa ber) anga sawi a nih si?)

Thuthlung Hlui leh Thar huna mitthi kaihthawh awm tawh zawng zawngte leh thawhlehna la awm tur zawng zawngte chu, Isuan thihna A hnehna leh A thawhna avanga awm thei chauh vek an ni a.

A thiltihtheihna, Ama nun ngei pawh pe a, lakir leh theitu a ni a, mi nung leh mitthi te Lalpa leh nunna zawng zawng hnar a ni (Johana 10:18; Rom 14:9; 1korinth 15:12-23).

Ani chu atira Pa hnena awm kan zinga lo awm ta chu a ni (Johana 1:1, 14). Judaten "Piang hmasa ber (fatir) nihna țawngkam hi thil pawimawhte zinga a pawimawh nihna chu an sawi fiah țha tawk hle a ni.

Josefan a nupui Mari a pawl hma hauh ațangin Mari hian Isua a lo pai mai ațang pawh hian, fatir (piang hmasa ber) Anihna chu a chiang a ni. Chhiar belh a tan: (Hebrai 1:6; Rom 8:29).

3. LEIA LALTE RORELTU;

Isua Krista, thihnate hneha, Adaman a hloh tawh he khawvel rawn tlanlet lehtu chu mihring te chunga roreltu dik a ni (Kolosa 1:20; 2:15).

"Chungnungbera chuan mihringte lalna ram chungah thu A nei a. A duhsak apiang A pe a, mi hnuaihnung berte pawh A luahtir țhin a ni" (Dan. 4:17)

4.MIN HMANGAIHA MIN TLANTU:

Krista min hmangaihna hrethiam tur chuan Anihna leh dinhmun dik tak kan hriat hmasak a țul .

A nihna țhenkhatte chu han tarlang ta ila:

Zawlnei Isaia chuan Chatuan Pa a ti a (Isaia 9:6). Engkim Siamtu a ni a (Johana 1:16). Engkim kengkawhtu a ni (Kolosa 1:17; Hebrai 1:3). Ani chu Pathian (Immanuel) chu a ni a. Pathian kan zingah A awm ta tihna a ni (Matthaia 1:23). Vana Vantirhkohten chibai an buk țhin a ni (Hebrai 1:6). Ani chu hmasang ata, chatuan ațanga awmtawh a ni (Mika 5:2).

Chutiang dinhmuna ding chuan min hmangaih avangin, A van ropuina zawng zawng kalsanin chhandam kan nih theihna tura A nun A rawn hlanna hi chatuan pawha kan fak nin theih tawh loh tur chu a ni.

"He miah hian hmangaihna enge anih kan hria, Amah chuan kan tan A nun A pek avangin" (1 Johana 3:16).

5. PATHIAN LEH PA LAMA PUITHIAMA MIN SIAMTU:

Hei hi Kohhran siamțhatute ngaih pawimawh berte zinga mi a ni. Krista'n Puithiama min siam tawh avangin, A hnena țawngțai turin Puithiam dang kan kaltlang a țul lo.

Puithiamte chu Pathian hnena thilpekte leh inthawinate hlantu an ni a (Hebrai 5:1; 8:3).

Hetah hi chuan Kristian zawng zawngte hian "Thlarau lam thil hlan" Țawngțaina te, Pathian pawlna te, lawmthu sawina te leh Pathian kan fakna te hlantu kan nihna hi Puithiam a min siamna chu a ni.

Pathian leh mihring inkarah chuan palai pakhat chauh A awm a. Krista Isua chu (1 Tim. 2:5).

Ani chu kan Puithiam Lalber a ni.

Amah avangin, zahngaihna kan hmuh theihna turin, khawngaihna lalțhutphah chu huai takin kan hnaih thei a ni (Hebrai 4:15,16).

MIT TIN RENGIN AN HMU ANG (Thupuan 1:7):

Bibleah hian Isua lo kal lehna thu hi vawi 1500 lai a chuanga, chu chuan a pawimawhzia leh a nghahhlelh awmzia a tilang.

A thisena tlansa A mi thianghlimte lam turin Isua Krista hi A lo kal leh dawn a, chu chu ringtuten kan beisei leh kan nghahhlelh em em, Kristian kan nih chhan ber chu a ni.

Tirhkoh Paula pawhin "Tun dam chhung chauhva Krista chunga beiseina kan neih chuan mi zawng zawng a khawngaithlak ber kan lo ni ang" a ti a (1 Kor 15:19).

Bible pum pui pawh hi A lo kal lehna thutiama tihtawp a ni a "A ni, ka lo kal thuai dawn e," tiin, Bible bu hnuhnung ber ziaktu Johana pawh hian a nghakhlel ngang a ni ang, "Amen, lo kal ta che, Lalpa Isu," tiin a chhang nghal a ni (Thupuan 22:20)

Isua Krista lo kal lehna hi a takin Amah ngei, hmuh theih leh ropui takin A lo kal lehna a ni dawn a. (Tirhkohte 1:11; Luka 24:36-43; Mathaia 24:27, 30; 16:27; 1Thess 4:16).

A nih leh mit tinrengin a hmu ang a tih hi, mi sual thi tawhte zawng zawngte kha an lo tho vek anga isua lo kal lehna hi anhmu vek dawn tihna em ni? A ni lo. He Bible chang hian misual thi tawh zawng zawngte a sawi tel lova, amaherawh chu A thihnaa mawhphurtute leh A naka chhuntute erawh chuan, A ropuinaa Amah hmu tur leh mi rinawm leh thuawihte hnena chawimawina pek lai hmu turinrei lo te kaihthawh an ni ang.

Chu chu a ni zawlnei Danielan "an zinga tam tak lei vaivuta muhil tawhte chu an lo țhangharh anga, țhenkhat chu chatuan nunnaah, țhenkhat zahna leh chatuan hmuhsitawmnaah" tia a lo sawi chu ni (Daniela 12:2).

He thu hi Amah Isua ngei pawhin Juda hruaitute A hrilhlawk tawh a (Mathaia 26:64). Chubakah Chanchin țha ziaktu Johana pawhin "a chhuntuten an la en ang" tiin a lo sawi bawk a ni (Johana 19:31-37)

LALPA NIAH CHUAN

(Thupuan 1:10):

Johanan heta "Lalpa ni" a tih hi Kristian intite zingah kan hriatthiam dan leh hrilhfiah dan a inang lo nuk mai. 

Țhenkhat chuan, "Rorelna ni a sawina a ni e" an ti.

Johana hian rorelna ni chu a sawi ve teh meuh mai. Mahse rorelna ni a sawi reng rengin, thil lo la thleng tur angin asawi țhin a ni.

Lalpa ni chu Sunday ah ngai tawk an awm bawk:

He ngaihdan pawh hi a dik chuang lo a ni. Bible ah hian Sunday sawi nan chuan nisarihni hmasa ber tia sawi a ni țhin.

Lalpa ni chu Sabbath ni hi a ni. Bible ah hmun tam takah Sabbath ni (Saturday) hi Lalpa ni thianghlim a nih thu kan hmu a ni.

RANGKACHAK KHAWNVAR DAHNA PASARIH

(Thupuan 1:12-13):

Heng te hian AD 31 ațanga Isua lo kal lehna thlenga kohhran pasarihte a entir a. Rangkachak hian Kohhrante hi Pathian ngaiha kan hlutzia a entir bawk.

Tin, khawnvar dahna zinga Isua a hmuh hian A kohhrante hnenah A awm chhunzawm zel tur a entir a (Mat 28:20; Kol 1:18).

KHAWNVAR DAHNA PASARIHTE THURUK

(Thupuan 1:20):

Thuruk (mystery) hi Greek țawng chuan "Musterion"a ni a. Hei hian tuma hriat theih loh thuruk a kawk lova, hretu hmasa awm tawh , hre ve tura a phal saka te (Krista neitute) hnena hriattir zel tura chu a ni (Mat 13:11; Rom 12:25; 1Kor. 15:51; Rom 16:25,26).

Ka blog min lo subscribe in min lo share sak ve dawnnia, enjoy.