HREHAWMAH PAWH I LAWM ANG U

(Rom 5:1-4)

 Kan thupui sawi tur hi ‘thiamchanna rah’ tih a ni a. A awmzia chu hrehawmnaah pawh lawm a awm theihna chu Pathiana thiamchang tawhte awm dan a ni e, tihna a ni ang. Mizo kristiante hi rinna kawngah kan kal thui lo hlein a lang. Rawngbawlna lamah pawh kan dai chin, kan thlen chin a sang vak lo. Kan lawmna leh hlimna tam ber hi hrehawmnaah a ni lo fo. Hrehawmnaah lawm thu sawi tur khawpin kannung ngamlo fo.
   
Sam ziaktu chuan, “Tihhrehawma ka awm hma khan ka vak bo thin a; Tunah erawh chuan i thu ka zawm ta,” tiin a sawi a. “I thu ruatte chu ka zir theih nana tihhrehawma ka lo awm kha ka tan a tha a ni,” tiin “Mihring siam that nan khawdur a ngai” tih a ni bawk. “Kros(hrehawmna) tel loin Lallukhum a awm lo,” tiin an sawi thin. Communist Lung Ina Isua an rin avanga tangte danglamna langsar tak chu hrehawmnaah an lawm thin hi a ni a. Lalpa Isua avanga tuarve tlaka an awm avangin lawmthu an sawi thin. Keini erawh chu chhanchhuaha kan awm avang te, tuarna pumpelhtu kan nih avangtein lawmthu kan sawi thin a nih hi!! Kawvela Kristiante zingah rinna avanga tuarna lam aiin Krista avanga lawmna leh hlimna dawng hnem kanni a. Hei vang hi em ni ang : Tuarna, hrehawmna kan ngai thei lo em em a ni. Kohhranhoah pawh hrehawmna lam chi hi chu a sawitu tur kan vang a,lawm tak a dawngsawng thei kan awm na hek lo!

Kan hnam pumpui nun hi han bih chianin hrehawmna hel duh hnam, hrehawmna pumpelh duh mi kan niin a lang(Kan eizawnna kawng hrang hrangah pawh tuarna leh hrehawmna chu kan pumpelh theih nan diklo leh fello zawk kan thlang fo a nih hi!! Kan rin ber Lal Isua chuan hrehawm pawisa lova a hnung zui turinmin ko si! Keini chuan hrehawm tlansana Lal Isua zui kan thlang si a ni lom ni? Hrehawmah pawh lawmaawm tur chuan kan hrehawm chhan hriatchian a tul. Tunah hrehawm mahila nakinah kan la nihlawh ngei ang tih ringtu tan chuan hrehawmah pawh lawma awm a harsa lo ve.

Rinawmna leh dikna avang chuan hrehawm tuar tur a awm ngei ang. Mahse Rinawmna leh Dikna vuan tlattu tan chuan hrehawmna pawh lawm naah a chang zel thin. Lal Isuan amah zuitu tur a thlannaah chuan hetiangin a sawi a “Tupawhin mi zui a duh chuan mahni hrehawm pawisa lovin ni tin a kros puin mi zui rawh se,” a ti a ni. Isua zuitu chuan hrehawm a tuar ngei dawn a, chuchu pawisa lovin Isua a zui tur a ni ang. Hrehawm pawisa lovin Isua a zui theih loh a nih chu! Isua avangin hrehawmah pawh lawm a awmin Isua mi kan nih a tul.

Kohhranho hian hlim leh lawm kan chak a, harhthar nih reng kan duh a, hrehawmna erawh chu kan tuar peih lo fo . Hei vang hian kan harhna a tlo lova, kan hlimna a tlo lo te pawh a ni ang. “Hrehawmna chuan chhelna a siam a, chhelna chuan hriatfiahna a siam a, hriatfiahna chuan beiseina a siam,” tiin Pathian thu chuanmin hrilh a ni. Pathian a beiseina nung nei zel tur chuan hrehawmna chu a kawngpui tihna a ni. Pathian remruat kan hriatfiah theih nan tihhrehawmna chu kan tan malsawmna a ni tih Sam ziaktuin min hrilh.

Kan ram leh hnam dinchhuahna tak tak tur hi hrehawm tuar huam naah a innghat thui hle ang. Lawm takahrehawm tuar peihtu kan tam hunah kan ram pawh hi a la ding chhuak ve ngei ang. Mimal nunah pawh lawm tak a hrehawm tuar peih apiangte’n malsawmna an dawng ngei ang. 

Pathianin chutiang mi malsawm chu a tiam si a.Paula chuan nakina a chanvo hlu tak a hriatreng avangin tuna hrehawmna hi chhu “hrehawmna nep tak” tiin a sawi mai a ni. Keini pawh nakin beiseina neiin tuna hrehawmah hian lawm takin i awm mai ang u. Beiseina chuan hrehawmah pawh lawmna min siam si a.

Ka blog min lo subscribe in min lo share sak ve dawnnia, enjoy.