SERMON: PATHIAN RALTHUAM FAMKIM

Ralthuam hmachhuana ram lak ching, ralthuam nena hmelma pal nek puara inluling thin mihringte hian ralthuam tha hlutzia chu kan hrechiang viau ta ve ang. Chempui leh muzuk fei atanga Jet fighter leh AK 47 thleng hian a hunlaia zira ralthuam pawimawh tak vek an ni a. A hlutna leh tangkaina tak erawh a hmangtuin a hman thiam leh thiam loh ah a innghat thui viau thung. 

Ralthuam avangin miin hnehna an chang fova, ralthuam tel lova hmelma kulhpui tawn chu electric kang mek tuihmanga thelh tum ang maiin sahimna tur a vang hle thin. Ralthuam hmanga kulh chhe tur venhim ani fova, Ralthuam hmang vekin Jerusalem kulh tih chhiat a ni thung. 

Mihringte bawhchhiat hnu ah ralthuam hian mihringte nunah chuan pawimawh tak a chang a, chu ralthuam vek chuan a siamtu mihringte nunna chhiarsen loh a la thung.

Tirhkoh Paula’n thlarau lam indona chungchangah pawh ti hian a lo sawi a, “Kan buante hi tisa leh thisen an ni si lo”. (Eph. 6:12) a lo ti a. 

Chu tah chuan Pathian ralthuam famkim a kan inthuam a tulzia a sawi chhunzawm nghal a ni. 

Hetah hian Paula hian taksa leh hmanraw tak taka inbeihna thua sawina a ni lova, thlarau lam indona thu a sawina zawk a ni. Tin, Pathian ralthuam, mihringte ralthuam ang ni lo Pathianin min pek ralthuam zawk hmanga sual ral do turin min hrilh a ni.

THUTAK Kan invenna Bulpui. “Chuvangin in kawng chu, thutaka hrengin, nghet takin ding rawh u”, (Eph. 6:14) Engnge thutak chu? Isuan a pa hnenah, “ I thu chu thutak a ni” a ti a. (Joh. 17:17) Setana thlemna leh a dawt thute kan lo dodalna tur hmanrua Pathian thu thutak chu kan hriat loh chuan sual bumna leh nek na a tan nget takin kan ding thei ngai lovang. Isua pawhin thlalera thlemna a tawh lai khan hei hi mawi takin a lo hmang tawh a. Setana remruatna tinreng chu, “Tiin ziak a ni” tiin a lo chhang zel a nih kha. Thu tak Pathian thu hi ralthuam a hman tlak khawpin kan hre chiang tur a ni.

Felna awmphaw chu hain (Eph 6:16) Kristiante hian felna chi hnih hi kan hre lar khawp awm e. Pakhatna ah chuan, Krista felna thupek chu kan dawng tawh a (2Kor 5:21). Hetah hian Isua ringtute hnenah a felnaa din theihna min pe a, ani chuan Kraws ah kan sualnate a lo phurh tak avangin chu felna chuan setana ram atangin min tlanchhuak ta si a.

Pahnihnaah chuan, Isuan thu min pekte kan awiha fel taka kan nun hian sual leh ramhuai tan hmun kan siam dawn lo a lo ni (Eph 4:26-27). 

Chanchintha pheikhawk chu nget taka bunin (Eph 6:15) Remna chanchintha in buatsaihna chu in ke a bunin (Eph 6:15) Pathian thu kan hriatte kan rin tlatna leh Chanchin Tha thu hmanga thil engkim kan tih hian Setana min beihna laka lo ding nget turin ke nghahchhan tha tak kan insiam a lo ni. 

Rom Sipaite chuan an pheikhawk hnuaiah hling an vuah vek a, indo na hmunah pawh an ke te phet mai lovin a nghet tlat thin an ti. Isua hi kan hotu a nih a, a thu kan rin tlat chuan Setana bumna laka ding nghet turin ke rahchhan nghet tak kan nei a ni.

Rinna phaw chu la ula, chumi chuan misual thal alh thei zawng zawng chu in timit thei ang (Eph 6:16) Hmelma sual leh ramhuai bumna (misual thal alhthei) dodal tura Pathian thua rinna innghat kan neih a tul thu hetah hian a lang chiang hle. Pathian thua kan thil hmuh leh hriatte kan rin a, chumi a kan inghah tlat chuan Setana bumna thu atanga min venghim turin phaw kan hmang tihna a lo ni.

Chhhandamna lukhum chu la ula, Thlarau ngunhnam, Pathian thu nen (Eph 6:17) Bible in chhandamna thu a sawi hian, setana sala kan tanna lak atanga mihringte min chhanchhuahna a kawk thei awm e. Pathian chuan “Thim thuneihna lak atanga min chhanchhuakin, a fapa hmangaih taka ramah chuan min kaitir ta” (Kol 1:13) a lo ti a. Setana’n chhanchhuah tawh mihringte ama rama la awm reng anga mite a rintir thinna lak ata min veng turin chhandamna, thir lukhum kan khum a tul a ni.

Chu mai a la ni lo, Paula’n Pathian thu tehkhin nana a hman thlarau ngunhnam hi ringtute ralthuam pawimawh tak a ni. 

Thlarau lama pasaltha Lal Isuan thlalera thlemna a tawh pawh khan Pathian thu atangin la chhuakin Setana kha a lo chhang thla zel tih kan hmu. 

Thlarau lam inbeihna ah chuan sual hneh turin Pathianin thu a sawite kan hriain kan vawng tlat tur a ni. Indona chu Lalpa indona a ni a, hnehna chu Lalpa ta a ni.