Genesis 2:16,17 Tin, LALPA Pathian chuan mihring hnênah chuan, "Huana thing tinrêng rahte hi i duh duhin i ei thei e; a chhia leh a tha hriatna thing rah erawh hi chu i ei tûr a ni lo: i ei chuan i ei nî la lain i thi ngei tûr a ni," tiin thu a pe a.
Philippi 1:21 Kei atân zawng nun hi Krista a ni si a, thih pawh hlawkna a ni.
Zoram ringtu intite hi a hun ngaihtuah chuan zirtirtu ni thei awm tak tawh tur deuh vek kan ni a, mahse a budelh ang mai hian Pathian thu ah kan sawngnawi tlat mai hi zirtirna diklo kan lo vawn rei lutuk tawh vang a ni tih a va chiang tak em!
Isua’n sim turin min ti lo va, min simtir a tum a ni tih thu kan sawi pawh hre thiam lo, zirtirna diklo emaw ti ta tlat kan va tam em, zirtirna dik a dik lo emaw ti tlat, a diklo zawk dik emaw ti tlat kan ni nual hlawm a ni tih kan pawm a ngai. Fapa tlanbo khân Vawk in bulah khan enge a sim ang? Eirukna, duhamna, thinrimna, hurna, zu hmun hlimna em ni a sim ang? Engmah sim tur a nei lo, nung reng si a thi si nun a nei a ni zawk. A pa ina a haw hnu khan apa in aṭang khan chhuak leh duh tawh miah lo se la, chu chu sim a ni chauh dawn a ni. Mahse, a ngaihtuah chhin ngai tawh pawh a rinawm loh, chu chu a ni kan sawi tum ber tur chu. Fapa tlanbo te kan sim tir vel ta mai mai a :-)
Pathianin Adama kha thei ei loh tur a tih kha a ei chuan i thi ang a ti a, Evi leh Adama khan an ei a, an thi dun a ni. Thlarauvah an thi a, sualah an nung thung a, Pathian tân thi an ni. Chuvangin, an thlah zawng zawngte pawh thi/nun nei lo/boral kan ni a, sualah kan nung hluah hluah thung a ni. Suala kan nung chu kan inhriat theih nan ‘Sim rawh u,’ min ti a, sim han tum tak tak ila, tuman kan thei miah lo, suala nung kan nihzia kan hriat theih nan sim kan tum a ngai, kan sim theih loh chuan suala nung kan ni tih kan inhre thei chauh a ni.
Tirhkoh Paula pawhin sim tumin a bei chiam a, a hlawhchham a, sual bawiha hralh tawh a ni tih a inhrechhuak a, mi rethei ka va ni tehlul em a ti hial a, keimah ah thil ṭha reng a awm lo, thil ṭha tihna pawh a awm lo a ti tawl mai a ni (Rom 7:18), keniah thil ṭha chhuak tur a awm bîk dawn em ni? Sim theihna kan nei bîk dawn em ni le? Sim rawh u, tih hi darthlalang ang a ni, sim kan tum a, kan sim theih lohzia kan inhria a, tunge? Engmi nge kan nih kan inhriat phah a, darthlalang ang chiah a ni. (Thufingte 20:9 "Ka thinlung ka tithianghlim a, Ka sual lakah ka thianghlim," tunge ti thei?)
Sim thei lo, doctor mamawh, mi bawrhsawm te tân sim ngai ve lo, sual kai lo, danglam ve ngai lo Isua Pathianin kan nun atân min pe a ni. Chu tak chu tirhkoh Paula pawhin, “Kei atân erawh zawng nun hi Krista, thih pawh hlawkna,” a lo tih ni. Krista lo chu nun kan nei lo, Eden bawhchhiatna avangin thi, nun nei lo kan ni a, nun nei lote nun ah Pathianin Krista min pe zâwk a lo ni. Chu chu a hre ve lote kan hrilh chiahin Chanchin Ṭha hril kan ni dawn tihna a ni. Tawk suh, tem suh tih zirtirna mai mai ah Pathian fa diktakte kan buai tur a ni lo.
Ka Ṭhian Duhtak, I duhzawng vana an tih angin lei a min ti rawh se, kan ti a ni lawm ni? Van a miten nitin sim an buaipui dawn lo, Chanchin Ṭha chiah an buaipui a ni tih i hria ang u aw…Chanchin Ṭha diktak kan hril hian kohhran mipui tam tak, ‘Hnehna chu Lalpa ta a ni,’ ti dur dur ho ai chuan mi pakhat Chanchin Ṭha kan hriat ang hi kan hrilh hriatin van amite an lawm zâwk a ni tih i hria ang u.
Lalpa’n malsawm rawh se.
Comments
Post a Comment