“Lâwm taka awm tûr a ni . . . a bo va, kan hmu leh ta si a.” LUKA 15:32.
1, 2. (a) Kristian thutak chu naupang ṭhenkhat chuan engtin nge an chhân lêt?
(b) Chutiang dinhmuna ding nu leh pate leh naupangte chuan engtin nge an inngaih?
“THUTAK ka kalsan dâwn!” Kristian nun dâna an fate enkawl tuma thawk rim Pathian ṭih nu leh pate tân chuan, an fate zînga pakhatin he thu a sawi hriat chu a va râpthlâk tak êm! Naupang dangte chu an thil tum puangchhuak chiah si lovin, an “tawlh bo” ringawt a. (Hebrai 2:1) Chutiang mi tam takte chu, Isua tehkhin thua fapa tlân bo, a pa in kalsan a, ram hla taka a rochan zawng zawng khawhraltu ang hi an ni. Luka 15:11-16.
2 Jehova Thuhretu tam zâwkte chuan he dinhmun hi tawng lo mah se, a tawngte tân chuan an lungngaihna la bo tak tak thei thlamuanna ṭawngkam a awm thei lo. Tin, a kal botu tawn theih lungngaihna pawh kan hmuh hmaih tûr a ni lo. A chhia leh ṭha hriatna chuan ani chu a tibuai hle thei a ni. Isua tehkhin thua fapa tlân bo chu atâwpah chuan ‘a inhre chhuak’ a, chu chuan a pa a tihlim êm êm a ni. Nu leh pate leh kohhrana mi dangte chuan fapa tlân bote chu ‘an inhriat chhuah’ leh theih nân engtin nge an ṭanpui theih Luka 15:17.
Ṭhenkhatin Thutak Kalsan An Thlan Chhan
3. Naupangte’n Kristian kohhran kalsan an thlan chhan ṭhenkhat chu eng nge ni?
3 Kristian kohhranah lungawi taka Jehova rawng bâwl naupang a nuai têlin an awm a. A nih leh, engati nge naupang dangte chuan an kalsan tâk mai? Khawvêl aṭanga thil ṭha tak engemaw chân neia inngaihna an neih vâng a ni thei ang. (2 Timothea 4:10) A nih loh leh, Jehova vênhimna chu a khirh lutukah an ngai a ni mai thei bawk. Mahni inthiam lohna te, mahni mipatpui leh hmeichhiatpui ni lote ngaihven lutukna te emaw, ṭhiante zînga tlâktlum duhna te emaw chuan naupangte chu Jehova berâm rualte zîng ata a tawlh botîr thei bawk. Naupang chuan a nu leh pate emaw, Kristian dang tuemawte
vêrvêkna avângin emaw Jehova rawngbâwl chu a bânsan thei bawk a ni.
4. Naupangte kal pên chhan bul ber chu eng nge ni?
4 Naupanga helhrâtna rilru put hmang leh nungchang chu thlarau lama a chauhzia hriltu a ni châwk a, a thinlunga awm târ langtu a ni bawk ṭhîn. (Thufingte 15:13; Matthaia 12:34) Naupang kal pên chhan chu engpawh nise, a bul berah chuan “thutak hriatna dik” an neih loh vâng a ni. (2 Timothea 3:7, NW) Tihdân phung pângngai anga Jehova chibai bûk ni mai lovin, naupangte chuan amah nêna inlaichînna bul tak an neih chu a pawimawh a ni. Chu mi nei thei tûr chuan anni chu engin nge ṭanpui ang?
Pathian Hnaih Rawh U
5. Pathian nêna mi mal inlaichînna nei tûr chuan naupang tân eng nge ṭûl?
5 Zirtîr Jakoba chuan: “Pathian hnaih rawh u, tichuan anin a hnaih ang che u,” tiin a ziak a. (Jakoba 4:8) Chutianga ti tûr chuan, naupang chu Pathian Thu châkna nei tûra ṭanpui tûr a ni. (Sâm 34:8) Atir chuan “hnute” Bible zirtîrna thu bul berte chu a mamawh ang.
Mahse, Pathian Thu a lâwm a, “chaw rum,” thlarau lam thurîl takte châkna a neih ṭan chuan, thlarau lamah a puitling thuai ang. (Hebrai 5:11-14; Sâm 1:2) Khawvêl nun kawngin a hneh tlat a ni tih pawmtu naupang pakhat chuan thlarau lam thil ngaihhlutna a lo nei leh ṭan a ni. Engin nge thlâk danglam ta? Bible chhiar chhuak tûra rawtna a dawn angin mumal taka Bible chhiarna a neih vâng a ni. A ni, Jehova nêna inhnaih tûr chuan Pathian Thu mumal taka chhiar a pawimawh êm êm a ni.
6, 7. Pathian Thu châkna nei tûrin, nu leh pate chuan an fate chu engtin nge an ṭanpui theih?
6 Nu leh pate tân, Pathian Thu châkna nei tûra an fate zirtîr chu a va han pawimawh tak êm! Chhûngkuaa zirna nei reng chung chuan, nula tleirâwl pakhat chuan ṭhian sual a kâwm a. An chhûngkuaa zirna chungchâng chu: “Ka Pa’n zawhna min zawh hian, a hmêl pawh en lovin a chhânna ka chhiarchhuak ringawt zêl a ni,” tiin a sawi a ni. Nu leh pa fingte chuan an zirlai zir zawh tum mai lovin, zirtîr thiamna an hmang a ni. (2 Timothea 4:2, NW) Naupangin zirna nuam a tih nân, thuzir chu a ngaihven zâwng leh a mi mal nun nên inkungkaihna a nei niin a hre tûr a ni. Chuvângin, engah nge mi mal ngaih dânte zâwt a, a ngaih dân i sawitîr loh vang? Naupangte chu thu zirlai a taka hmang tûrin fuih rawh.
7 Chu bâkah, Pathian thu insawihona chu hlimawm tak nihtîr ang che. Tihâwm a nih chuan, Bible a thilthlengte chu naupangte channawntîr ang che. Thilthleng an sawiho lai thlenna hmun leh leilung pianhmangte an mitthlaa hmu thei tûrin ṭanpui rawh. Ram thlalâk leh a lemte hmanna chuan a ṭanpui thei ang. Ni e, ngaihtuahna tlêm han hman deuh chuan, chhûngkuaa zirna chu a hlimawmin, chi hrang hrangin a tih theih ang. Nu leh pate chuan Jehova nêna an inlaichînna an enfiah bawk tûr a ni. Anmahni ngeia Jehova an hnaihna chuan, an fate pawh hnaihve tûrin a ṭanpui thei ang. Deuteronomy 6:5-7.
8. Ṭawngṭaina chuan mi chu Pathian hnaih tûrin engtin nge a ṭanpui?
8 Ṭawngṭaina pawhin Pathian hnaih tûrin min ṭanpui thei bawk. Tleirâwl chhuaktîr hmeichhe pakhat chu Kristian nunkawng leh a rinna ṭawmpui lo a ṭhiante nêna inkawmna inkârah duhthlan tûr hre lovin a buai hle a. (Jakoba 4:4) Engtin nge a tih tâk? “Ka awm dân chu hriattîrin nasa takin ka ṭawngṭai a, chu chu tih tak zeta ka ṭawngṭai hmasak ber a ni,” a ti.
Atâwpa a thurûk pawh hrilh ngamna tûr, Kristian kohhran chhûnga mi ṭhian a hmuh avângin a ṭawngṭaina chu Pathianin a chhâng a ni tih a ring tlat a. Jehova’n a kaihruai a ni tih inhriain, Pathian nêna mi mal inlaichînna a nei ṭan ta a ni. Nu leh pate chuan anmahni ṭawngṭaina tichangkângin, naupangte chu an ṭanpui thei a. Chhûngkuaa ṭawngṭainaah, nu leh pate chuan an thinlung chu Pathian hmaah an leihbaw thei a, tichuan an fate chuan an nu leh pate leh Jehova inkâra mi mal inzawmna nghet tak an hre thei dâwn a ni.
Dawhthei La, Mahse Nghet Tlat Rawh
9, 10. Israel mi tihmawh takte chunga dawhtheihna a lantîrnaah Jehova chuan entawn tûr eng nge a siam?
9 Naupang chu a tawlh bo ṭan a nih chuan, awm hran a tum ang a, thlarau lam thil sawipui tûra a nu leh pate thawhrimna engpawh chu a do ṭan ang. Chutiang dinhmun harsa takah chuan nu leh pate chuan eng nge an tih theih? Hmân lai Israelte chunga Jehova thiltih chu ngaihtuah rawh.
Israel hnam “luhlul tak” chu kum 900 chhûng a dawh hrâm hrâm a, chu mi hnuah chuan a kalsan ta a ni. (Exodus 34:9; 2 Chronicles 36:17-21; Rom 10:21) Pathian chu “an fiah” fo nachungin, Jehova chu an lakah ‘lainatnain a khat’ a ni. “Vawi tam tak a thinurna chu a la kîr a, a thinrimna chu azain a chawk tho duh ṭhîn lo.” (Sâm 78:38-42) Anmahni a dâwrnaah Pathian chuan sualna a nei lo. Hmangaihna nei nu leh pate chuan Jehova an entawn a, an fate’n ṭanpui an tumna an dawn duh nghâl loh pawhin an dawh hrâm hrâm a ni.
10 Dawhtheihna, a nih loh leh zâwldawhna chu rei tak tuar tihna mai a ni lo; inzawmna ṭha awm lo chung pawha beiseina zawng zawng hloh duh lo tihna a ni.
Jehova chuan dawhtheih dân tûr chungchângah entawn tûr min siam a. Israel mite hnênah chuan “theihpatâwpa ṭhahnemngaiin mi a tîr a,” chutiang chuan hma a la a ni.
“Pathian mi tirhte chu an hmusit a, a thute chu an ngainêp” chung pawhin, Jehova chuan “a mite . . . chu a lainat” a ni. (2 Chronicles 36:15, 16) Israel mite hnênah hetiang hian ngenna a siam a ni: “Mi tin mahni sual kawng ata lo kîr . . . rawh u,” tiin. (Jeremia 25:4, 5) Chutichung chuan, Jehova chuan a thu bul felte chu a kalh chuang lo. Israel mite chu Pathian leh a kawngte lama “lo kîr” tûra zirtîr an ni.
11. An fa kalpêng te an dâwrnaah engtin nge nu leh pate chu dawhthei chunga an ngheh tlat theih?
11 Nu leh pate chuan an fa kalpêngte chunga beiseina zawng zawng hloh nghâl lohna hmangin Jehova dawhtheihna chu an entawn thei a ni. Beiseina hloh nghâl lovin, an inbiakpawhna kawng chu hawng reng tûr emaw, awmtîr leh tûr emawin hma an la thei a ni. Thu bul felte vuan tlat chungin, thutaka lo kîr leh tûrin an ngên ‘nawn fo’ thei a ni.
Naupang Kumtling Lo Hnawhchhuah A Nihin
12. Kohhran aṭanga hnawh chhuah kumtling lo naupang chungah nu leh pate chuan mawhphurhna eng nge an neih?
12 A nih leh nu leh pate bula awm naupang kumtling lo chu sual nasa takah inhnamhnawihin, a inchhîr duh loh avânga kohhran aṭanga hnawh chhuah ni ta se engtin nge ni ang? Nu leh pa bula a la awm avângin, Pathian Thu mila zirtîr leh zilh tûrin nu leh pate chuan mawhphurhna an la nei cheu va ni. Chu chu eng anga tih theih ngei ni ta ang?Thufingte 6:20-22; 29:17.
13. Nu leh pate chuan thilsual titu an fate thinlung thlen chu engtin nge an tum ang?
13 A hranga Bible zirpui hunah chuan chutiang zirtîrna leh zilhna chu a pêk theih ang; dik takin, chutiang huna pêk chu a ṭha ber a ni. Nu leh pate chuan naupang thinlung chawlawl tak piah lam thlîrin, a thinlunga thil awm chu hriat an tum ngei tûr a ni. Thlarau lama a dam lohna chuan eng chen chiah nge a huam? (Thufingte 20:5) A thinlung nêmna lai chu a hneh theih ang em? Pathian Lehkha Thu châng eng nge ṭangkai taka hman theih ni dâwn? Tirhkoh Paula chuan: “Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thlîng phel hrang khawp hialin a chhun thei a, thinlunga ngaihtuah leh tumte hi a hre nghâl thei a ni,” tih min tiam a ni. (Hebrai 4:12) Nu leh pate chuan an fate chu thilsual tihnaa inhnamhnawih tawh lo tûra hrilh mai aia tam an ti thei. Hma lain, tihdamna an ṭan thei a ni.
14. Thil sual titu naupang chuan Jehova nêna an inlaichînna nei leh tûr chuan eng nge a tihhmasak ber ang a, chu mi ti tûrin engtin nge nu leh pate chuan an ṭanpui theih?
14 Thil tisualtu naupang chuan Jehova nêna a inlaichînna a siam ṭhat a ngai a. A tihhmasak ber tûr chu ‘sim a, hawi kîr leh’ hi a ni. (Tirhkohte 3:19; Isaia 55:6, 7) Naupang chu sim tûra in lama ṭanpuinaah nu leh pate chu “sual chungah dawhtheiin” zirtîrna dawng ṭha duh lo naupang chu ‘thuhnuairawlh takin an zirtîr zâwk tûr a ni.’ (2 Timothea 2:24-26) Ani chu Bible sawi ang chia an ‘zilhhau’ a ngai a ni.
‘Zilhhau’ tia lehlin Grik thumal chu “thiam loh . . . hriattîr” ti pawha lehlin theih a ni a. (Thu Puan 3:19; Johana 16:8) Chuvângin, zilhhaunaah chuan naupang thiltih chu a sual a ni tih hriattîrna a tel tûr a ni. Chutianga tih chu a awlsam lo ngei ang a. A theih chuan, nu leh pate chuan Pathian Lehkha Thu-in a kalh loh phawt chuan kawng engkim hmangin a rilru hneh an tum thei ang. Naupang chu ‘sualna hua a, ṭhatna ngainat’ a pawimawhzia hre thiam tûra ṭanpui chu an tum tlat tûr a ni. (Amosa 5:15) Ani chu a inhre chhuakin, “Diabola thang ata [a] chhuak thei” mai thei asin.
15. Thil tisualtu leh Jehova inkâra inlaichînna awmtîr leh tûrin ṭawngṭaina hian eng chanvo nge a neih?
15 Jehova nêna inlaichînna nei leh tûr chuan, ṭawngṭaina hi loh theih lohva thil ṭûl a ni. Amaherawhchu, tûn hmaa Kristian kohhran lo bêl tawh si a, sim duh lova sual bawraw tak tak tiluitu tân chuan tuman kan “dîlsak” tûr a ni lo. (1 Johana 5:16, 17; Jeremia 7:16-20; Hebrai 10:26, 27) Nu leh pate erawh chuan an dinhmun tawn hmachhawn thei tûra an mamawh finna pe tûrin Jehova chu an ngên thei a ni. (Jakoba 1:5) Hnawh chhuah naupang chuan inchhîrna lantîr si a, ‘Pathian lama ṭawng huaina’ a neih si loh chuan, a nu leh pate chuan, naupang sualna chu Pathianin a ngaihdam theih dân kawng a awm chuan Ama duhzâwng anga a chunga thil ti tûrin an ṭawngṭai thei a ni. (1 Johana 3:21) An ṭawngṭaina chuan Jehova chu lainatnaa khat a ni tih hmu tûrin naupang chu a ṭanpui tûr a ni. Exodus 34:6, 7; Jakoba 5:16.
16. An chhûng zînga naupang kumtling lo hnawh chhuahte chu engtin nge kan ṭanpui theih?
16 Baptisma chang tawh naupang chu hnawh chhuah a nih chuan, kohhran mi leh sate chu amah ‘pâwl tawh lo tûra’ beisei tlat an ni. (1 Korinth 5:11; 2 Johana 10, 11) Chu chuan atâwpah chuan ‘inhre chhuak’ a, Pathian vênhim pâwlte zînga lo kîr leh tûrin a ṭanpui mai thei a ni. (Luka 15:17) A lo kîr leh emaw, kîr leh lo emaw pawh ni se, kohhran mi leh sate chuan hnawh chhuah naupang chhûngkaw zînga mite chu an fuih thei a. An lakah chuan ‘inlainat tawnna’ leh “khawngaihna” lantîr theihna kawng chu kan zawng ṭheuh thei a ni. 1 Petera 3:8, 9.
Mi Dangte Ṭanpui Theih Dân
17. Kalpêng naupang an ṭanpui hian kohhran mi leh sate chuan eng thil nge an hriat reng ang?
17 A nih leh, Kristian kohhran aṭanga hnawh chhuah ni si lo, rinna lama chak lo naupang chu engtin nge ni ang? Tirhkoh Paula chuan: “Pêng khatin a tuar chuan pêng zawng zawngin an tuarpui ṭhîn,” a ti a. (1 Korinth 12:26) Mi dangte chuan chutiang naupang chu an ngaihsak thei a ni.
Thlarau lama bawrhsâwmna chuan naupang dangte a kaichhâwn theih avângin fîmkhur a ngai a. (Galatia 5:7-9)
Kohhran pakhata puitling ṭhenkhat chuan, thlarau lama chau naupangte ṭanpui nân thil tum ṭha tak neiin, tûn lai chhuak rimawi tum ho tûrin an sâwm khâwm a.
Naupangte chuan chu sâwmna chu zâwmin, chutiang hun hman chu nuam an ti hle nâ a, an inkawmna chuan atâwpah kohhran nêna an inzawmna a tichhe ta a ni. (1 Korinth 15:33; Juda 22, 23) Chutiang naupangte chu thlarau lama kaihhruaina awm lo inhmuhkhâwmnate chuan a ṭanpui lo va, thlarau lam thil duhna neihtîr thei inkawmnate chuan a ṭanpui thei zâwk a ni.
18. Isua tehkhin thua fapa tlân bova pa rilru put hmang chu engtin nge kan entawn theih?
18 Kingdom Hall emaw, inkhâwmpui emawa lo inkhâwmleh, kohhran kalsan naupang awm dân tûr chu han ngaihtuah teh. Isua tehkhin thua fapa tlân bova pain a lantîr angin, dawnsawn duhna rilru put hmang kan lantîr tûr a ni dâwn lâwm ni? (Luka 15:18-20, 25-32) Kristian kohhran kalsan a, a hnua district inkhâwmpui chhîmtu tleirâwl pakhat chuan:
“Keimah ang mi chuan tu ngaihsak a hlawh pawh ka lo ring lo va; mahse, unaute chuan min pan a, min lo lâwm a. Chu chuan ka thinlung a khawih tak zet a ni,” a ti.
Bible a zir ṭha leh a, a hnuah baptisma a chang ta a ni.
Beidawng Mai Suh
19, 20. Fapa tlân bo chungchângah rilru put hmang ṭha neih chu engvângin nge thil pawimawh tak a nih?
19 “Fapa tlân bo” chu “a inhriat chhuah” nâna ṭanpui nân dawhtheih a ngai a; chu chu nu leh pate leh mi dangte tân thil harsa tak a ni thei.
Mahse, beidawng mai suh. “Mi ṭhenkhatin muanga an ruat angin Lalpa chu a thutiam kawngah chuan a muang lo ve; tuma boral duh lova, mi zawng zawng lo sim duhin, nangmahni lamah a dawhthei a ni zâwk e.” (2 Petera 3:9) Bible in mite chu inlamlêt a, nunna an lo neih chu Jehova duhzâwng a ni tih min hrilh a. A dik a dik chuan, ani chuan mihringte nêna a inrem theihna tûr ruahmanna a lo siam tawh a ni. (2 Korinth 5:18, 19) A dawhtheihna chuan mi maktaduai tam takte chu a inhriat chhuahtîr a ni. Isaia 2:2, 3.
20 Chutiang a nih chuan, nu leh pate chuan kumtling lo an fapa tlân bo inhre chhuak leh tûrin, Pathian Lehkha Thu kaihhruaina engkim chu an hmang tûr a ni dâwn lâwm ni? Jehova entawnin, i fa chu Jehova lama lo hawi ngei tûra i ṭanpuinaah chuan dawhthei tak ni ang che. Bible thu bulte vuan nghet tlat la; tin, Jehova ṭanpuina i dîl hian a mizia hmangaihna te, rorêl dikna te, leh finna te chu entawn tum ang che. Mi sual rilru sak takte pawhin lo hawikîr tûra Jehova sâwmna an dawng tawh a, i fapa tlân bo emaw, fanu tlân bo emawte pawh chu Pathian vênhim berâm rual zîngah an lo kîr leh mai thei asin.
https://t.me/joinchat/-5qTxVpLHuk_iHQarM54A
http://www.appcreator24.com/app911916
https://issaclaltlanhlua.blogspot.com/?m=1
https://www.facebook.com/groups/580963752482162/
Comments
Post a Comment