"Chutichuan amah an hmuhsitna chu phurin daipawnah a hnenah i kal chhuak ang u, Heb. 13 : 13.
Thuthlung Hlui hunah chuan miin thihna khawp sual a tih chuan thinglerah an khai hlum țhin. A ruang chu thingah chuan zankhuain a awm tur a ni lo va, a ruang chu la thlain an phum nghal thin.
Rom sawrkar hnuaiah pawh mi thi tlaka an ruat chu Krawsah an khengbet thin a. An khenbeh tur te chu an khenbehna tur hmun thlengin kraws an puttir țhin a, an hmusit em em țhin.
Misual thi tlaka ngaih te chu leiah leh vanah pawh thi tlak lohva ngaih an nih avangin boruakah lei si lo, van si lovin Krawsah khai kangin saruak ngal ngatin an tihlum țhin a ni, (Matt. 27 : 38).
An hmuhsitna phurhpuiin : Kan sual avanga suala siama awmin kan Lapa Isua Kristan chutiang Kraws hmuhsitawm tak chu pua amah hmusittuten an zui hum hum laiin Simona chuan Krista an hmuhsitna Kraws chu putpuiin daipawnah a hnen lamah a kal chhuak ve ta a (Lk. 23 24). Amah an hmuhsitna phurhpuitu dik tak leh hmasa ber a ni awm e. Chutiang bawkin kan Lalpan, “Tupawhin mi zui a duh chuan mahni hrehawm pawisa lovin, nitin a kraws puin mi zui rawh se,” tiin ringtute min sawm a ni, (Lk. 9 : 23).
Krista an hmuhsitna chu kan phur ve ngam em ? Krista an hmuhsitna chu kan phurhpui ve peih dawn em? Kan zahpui dawn em? Mosia chuan, “Pharaoa fanua fapaa vuah a duh lo va, ….. Krista an hmuhsitna chu Aigupta ram rote ai chuan sum ropui zawkah a ruat a; lawmman pek tur chu a thlir țhin avangin,” Heb. 11 : 24 25.
Mosia ang hian Amah an hmuhsitna chu kan phurhpui ve ngam dawn em ? Ama hmingin hrehawm kan tuar ngam dawn em ? Mahni hming țhatna, fak leh chawimawina duh vang maia rawngbawl leh ram thima chhuak leh thawkte kan lo ni mai ang e!!!
[adToAppearHere]
Daipawnah a hnen lamah i kal chhuak ang u : Hebrai ziaktuin a sawi hi a hlimthla ațanga a tak lo thleng entirna a ni. Exod. 33 : 7-ah chuan Mosian riah hmun pawn lam hla deuhah puan in a zar thu kan hmu a, chu chu “Inbiakna Puan In” tih a ni. Tupawh Lalpa zawnga be duh apiang riah hmun pawn lam hla taka inbiakna pua inah chuan an kal țhin a. Chutiang bawkin Jerusalem khawpui chhung Temple-a inthawina hmun Kulh kawngkhar pawn lamah sual tana Inthawina Maicham hunin a awm a. Kulh kawngkhar pawn, daipawnah chuan khawvel pumpui sual thawina atana Pathian Beram No hmelhem lo leh sawisel bo chu hlanin a awm a. Mosia dana biakna leh inthawina piah lam, daipawn lama tlawmna leh thihna Kraws Maicham lam chu panin rinnain i kal chhuak ve ang u. Chutah chuan mi sualte tana Inthawina Maicham chu kan hmu ang a, sual thua rorelna lak ata aiawhtu Krista thisen chhuak avangin thiam chang kan ni tih kan inhre thei ang. (Tirh. 13 : 38, 39). Pathian felna chu chutah chuan tihlanin a awm a, tupawhin Kraws Maichama sual tana thisen luang chu a sual tlenfai nan a luang a ni tih a pawm chuan thiam chang a ni tih a inhre bawk ang, (Rom 3 : 21-28). Chu thisen avang chuan, “Thiam chan loh ka hlau tawh lo vang, ka Pa lung a awi ta” tiin Amah ringtu chuan a ti thei ta a ni. Unau, thiam i chang ve tawh em?
Isua hnung zuitute daipawn lamah i kal chhuak ve ang u :
Isua hnung zuitu rinawm nih kan duh chuan Daipawna kal chhuah ve a țul. Heta Daipawn a tih hi thlaler biakbuk puanzar pawn lama sual thawina ran sa, vun leh ek an paihna hmun leh halralna kha a sawina a ni a. Chu miin a entir chu Jerusalem kawngkhar pawn lama hmusit taka Isua an khenbehna hmun kha a ni, (Lev. 4 : 12, 21; 9 :11; 16 : 27; Exod. 19 14; Mk. 15 : 22). Daipawna kal chhuahna hmun tur chu, Golgotha, luruh hmunah chuan a ni. Vawiinah hian a tak taka Kalvari muala daipawn hmunah chuan kal turin min phut lo va, thlarau lamah Krista an hmuhsitna chu phurin khawvel nawmsib leh ropuina umna piah lam daipawn – ram pawnah, mite nuihzatna leh hmuhsitna hmun, ramthim, hnam hnufual, Krista leh a chhandamna la hre lote hnenah, inngaihtlawmna leh thuhnuairawlhna, hmangaihna leh khawngaihnaa inthuamin, Krista nghawngkawl bata vak chhuaka, țap chunga buh chi feh chhuahpui tura koh leh thlante kan ni. Chutianga pen chhuak turin kan inpeih em ?
Comments
Post a Comment