Matthaia 24:42
“Chutichuan ngaihven rawh u, eng niah nge in Lalpa a lo kal dawn in hre si lo.
Matthaia 24:44
“Chuvangin, nangni pawh inring rengin awm rawh u, in rin loh hunah Mihring Fapa a lo kal dawn si a.”
Matthaia Bung 24 ah hian hun hnuhnunga thil lo thleng tur leh Lal Isua lo kal hnaih thu uar takin a sawi a. Lo inbuatsaih leh lo inrin dan tur thiam a har awm hlein a lang. Kan hriat theih dan tur hnai ber erawh min hrilh thung. Chumi ni a lo thlen dawn hnaihah chuan indo thu leh indo thu thang te, ram hrang leh ram hrang an indo ang a, hnam hrang leh hnam hrang an indo ang. Tam te, hri leng te, lirnghing te a thleng fo dawn a, zawlnei derte pawh an lo chhuak ang a, suahsualna lam thuah chuan Nova damlai huna sualna nasa tak ang kha a ni ang. Chu hun chu kan khawvel hian a tawng mek a ni.
Lal Isua lo kal hun tur chu hriat theih a ni lo va, tuman, fapa pawhin, Pa chauh lo chuan an hriat loh thu a sawi a.(Mt. 24:36 ) Chuti a nih chuan inring renga awm a ngai hle tih chu a chiang khawp mai.
Lal Isua lo kal hnaih tawh dan chu, tunlai takin entirna lo siam ila, miin football an khela leh lam team chuan an pet goal tep tawh a, 24 line chhungah ball an khalh lut tawh a, pet lut thut thei dinhmuna a ding reng tawh ang chu a ni.
Inrin reng dan ka thiam lo!
Helai thu in rin loh hunah tih hi mi tam takin, in inrin loh hunah tiin an chhiar thin a, an chhiar sual fo avang hian a awmzia an hriat thiam loh phah thin niin a lang. In rin loh hunah( an hour you do not expect,) a ti. Mi thenkhatin, ‘kan muthilh hlanah lo kal se, engtinnge kan inrin reng theih ang? an ti thin. Thenkhat dang chuan hna kan thawh laklawh laiin lo kal ta se, kan inring hman lo ang an ti bawk.
Heti hian ngaihtuah teh ang. Lala chuan BA a passed tawh a, mi pawimawh tak pakhat hian BA passed chin ka rawn hruai dawn a, englai pawhin lo inpeih rawh u, ” a ti a. Chu mi avang chuan Lala chuan hna a thawh loh phah chuang lo va, a mut loh phah chuang lo, a hnathawh lai te, a mut bawrh bawrh lai pawhin BA a nihna a bo chuang tawh lo a ni.
Chutiang chu inring renga awm dan chu a ni e. Lal Isua lo kal lehna turah pawh kan inrin reng theihna zawk chu Ama nunna kan neih hi a ni. Eng hunah pawh lo kal se, inring reng nun chu kan nei tawh a lawm.
Lal Isuan,” “Tih tak meuhvin, tih tak meuhvin ka hrilh a che u, tupawh ka thu hriaa mi tirtu ring chuan, chatuana nunna a nei tawh, thiam lohvin a awm lo va, thihna ata a chhuak a, nunnaah a lut ta zawk a ni.”(Joh.5:24) a tih kha.
Paula pawhin, ” Chutichuan tunah zawng Krista Isuaa awmte tan chuan thiam loh chantirna reng a awm tawh lo.
Krista Isuaa Nunna Thlarau dan chuan sualna leh thihna dan ata chu mi tichhuak tawh si a.”(Rom 8:1-2) tiin chiang takin Isua nei tawh te nun thlamuanawm zia min hrilh kha.
Lal Isua i neih tawh phawt chuan, i chaw ei lai, i hnathawh lai leh mut hlan pawh nise, i zin chhuahnaah pawh Krista tawk tura inpeih nun chu i neih avangin hlauhthawn tur a awm tawh lo ve.
Inring reng lo nun chu hei hi a ni.
Matthaia 24:48-51 “Amaherawhchu bawi sual chuan, a rilruin, ‘Ka pu a lo kal lawk dawn lo ve,’ tiin, a bawipuite lo vel ta sela, mi ruite hnenah eiin bar sela, chu bawia pu chu a rin loh niah, a hriat loh laiin a lo kal ang a, bung hnihah a rawn chhuah ang a, mi vervekte chan ang a chantir ang; chutah chuan tah leh ha thial chu a awm ang.”
Hei hi inring reng lo awm dan chu a ni a. Isua a lo kal tak tak pawh ring lovin Setana duhzawng tiin khawvel lamah an tlan a, chutih lai tak chuan Lal Isuan a rawn phâwk dawn a ni. An chan tur chu a rapthlak hle ang.
Hmangaih Johana chuan, “I-Johana 2:18 Naute u, hun hnuhnung ber chu a ni ta e,” tih min hrilh a nih hi. Pa hun a liam a, fapa hun a liam leh ta, Thlarau Thianghlim hun hi hun hnuhnung ber chu a ni tawh. Hei lo hi khawngaihna hun a awm tawh lo vang. Lal Isuan, “Tupawh mihring Fapa sawisel apiangte chu, an sawiselna chu ngaihdamsak a ni ang; tupawh Thlarau Thianghlim meuh sawisel apiang erawh chu, an sawiselna chu tun dam chhungah pawh, hun lo la thleng turah pawh ngaihdamsak a ni lo vang.” (Mat.12:32) a tih kha. A awmzia chu Lal Isua huna amah lo pawm duh lote tan pawh khawngaihna hun, Thlarau Thianghlim hun chu hawnsak leh an ni a.
Nimahsela Thlarau Thianghlim meuh sawi chhetu tan chuan khawngaihna hun dang a awm tawh dawn lo va, kumkhuaa thiam loh channa a tling tawh dawn a ni.
Unaute u, hun hnuhnung berah hian Lal Isua tawk turin i inpeih tawh em le?
Pathianin malsawm rawh se.
Comments
Post a Comment