"LALPA i thununa i dan i zirtirte chu an nihlawh e, Mi sualte tlak nân hum laih zawh hma chu, Mangan niah i hahchawlhtir dâwn si a."(Sam 94:12-13)
Mi nun tluang em em chhungkua tha si, nei pangngai bawksi, hmingchhiatna nei bawk silo te hi, han thlir hi chuan, awh mai an va awl tak em! Heng chhungkuate hi mihring mai an nih ve avang hian, an lo chak reng bik hauh loa, an zingah hian Lalpa avanga tluangchhote pawh an awm teh meuh mai, heng chhungkaw zingah hian Lalpa avang ni lemlo vannei ve hrim hrimte pawh an awm ti ila kan sawi sual lo ang.
Eng chhungkua pawh nise, Lalpa an vawn tlat loh chuan, nun kawng kawiah hian sut tur a awma, eng anga tluang thin pawh hi, Lalpa nen an kal loh chuan, chu kawngkawia sut tur chu an sua, a ri bura an chuai zui nghal mai thin.
Chungte chu hmuha han thlir hian, Lalpan chungte chu kan tawh ve loh natuara, kan fimkhur theih nan, kawng chhukchhoa minlo hruai thin avang hian, "ka lawm e", kan ti leh thin zawng a nih hi. Kan kawng hi tluang purh purh sela chuan, fimkhur nachang kan hre bik lovang le.
Bible kan en chuan, chhungkaw hun serhah pawh telve tura an duh loh Davida kha kan hmu a nga. Unau tluang purh purh, pian tha si, hmeltha si te karah khan a telvea, hmuhhmaih a nih pawh hi a awm viau a ni. Tunlaia i nunah pawh khan, hmuhhmaih i ni ve tawh em le? I thiante zawng miin an chibai liam liama, nangchu chibai loa kal kan i ni ve thawh em le? I thiante zawng chu miin an hre em em a, nang chu tunge i nih, tih zawhnate i dawng ve tawh em le?
Chutiang chu ilo ni ve tawh a nih chuan, Davida Lalpan a hmuhhmaih loa, Beram ek rim nam chum chum mahsela, hei ngei hi ka thlana chu a ni e, tiin Samuela hriak a thihtir ang khan, hriak a tih thawh maithei che a sin.
Ni e, Davida unau, piantirh atanga vannei bik, ek dura tal ve ngai lote khan, an dinhmun siamthat nan khan rinna an mamawh ve loh avangin rinna pawh an nei lemlo renga. Chu rinna ngei chu, beram rimchhe kara awm thin, chung beram karah pawh Lalpa fak thulh duh chuanglo Davida chuan a neia. Goliatha a hmuh chiah khan, a hmachhawn ngam a nih kha.
Chubakah kan Pathian hi amah rinna avanga, miin a beih ngam loh a beih hian, a tlanchhiatsan ngai loa, a ensan ngai bawk hek lo. Mi tluang perh purh hoin, an ralthuam tha ber ber nena an hmachhawn ngam loh Goliatha kha, chhungkaw zinga chhiar tel pawh ni phalo Davida khan, virvawm mai nen a hmachhawnna, Lalpa thatna chuan a hual vela, a vawm tlu der a nih kha.
Goliatha a tluk chiah kha chuan, Davida kha tunge anih tumahin an inzawt leh tawh ngai loa, Goliatha hnehtu Davida kha an ti tawh a ni.
Nangpawh Lalpa beiseina nen i hmaa milian kha beiturin i rinna siamthala tho rawh le, i lamah Lalpa atang asin.
Davida chanchinah let leh ila, Goliatha hneh tawh mahsela, a zinkawng ala tawplo, Israel lal tha ber leh chak ber niturin Lalpan Davidaah chher tlak zia a hmu ek ek chauh ala ni. Tichuan, sipai hotu lu atang, out law (tlanbo) Davida a nih kha a phala, chu zinkawng hreawm takah chuan, Israel lal ropui ber a nih theihna tur zia (character) chu Lalpan pek a tum chauh a ni, tichuan kum 15 lai Lalpan a zirtir hnuah Israel lal ropui ber ni turin, lal thutthlengah a thu ta a ni.
Davida unau, mi tluangte kha chu, zirtir tlak an nih a rinawm loh, Davida khan kum 15 puk leh ramahte hreawm takin a awma, a tuar chhuaka, a uante kha ni ve ta sela, kum 1 pawh an awm theih a rinawm loh a ni. A pawimawh lai chu hei hi a ni ta, "hriak a tih loh chu, zirtir tlakah Lalpan a ngai loa, zirtir pawh a zirtir lo a ni." Hetiang ang chiah hian, Krista chhandamna changtu apiang hriak thih kan nih vek rual hian, eng emaw tha bik tithei tura chher che a duh avangin, Lalpan nasa takin, hun rei tak a zirtir che a ni thei a ngem!"
Davida khan hmanah chuan, Goliatha ka hneh tawh asin mawle, a ti thin maithei a, amah ang chiah hian hmanah chuan Lalpan thil ropui tak min tih tir tawh a sin mawle, kan ti ve maithei. Mahse, Davida zirtir chhunzawm zel a thlang ang chiah khan, min zirtir chhunzawm zel hi Lalpan a thlan avangin kan harsatna hi a tawp mai lo a ni thei asin.
Hawh u, Lalpan min dahduhna hmun taka min dah theihna turin, min zirtir a duhte hi hun a duh reiin a kawng a thui deuh a nih pawhin, tha takin i zir zel ang u.
(Tawngtai Dan Tur)
Lalpa, fimkhur taka nun ka hman theihna tura ka nun hian kawng chhukchho a zawh i phal avangin ka lawm e, ka harsatna chhungah hian zirtir duh min nei a ni tih hi ka hriat renga, min zirtir i duhte chu tha taka ka zira, ka zir thiam theih nan min pui ang che. Amen. Ti ang aw.
Comments
Post a Comment