"Tichuan thil tha tih i ning suh ang u; kan inthlahdah loh zawngin a hun takah chuan kan seng dawn si a."(Galatia 6:9)
Israel ramah chuan kum eng emaw zat ruah a sur tawh lo va, ruah a sur loh avang chuan thlai a to thei lo va, tam a tla a.
Pathianin zawlnei Elija chu Zarephath khuaah awm la, hmeithai pakhat chawm tur chein thu ka pe tawh a tia.
Chu khua ava thlen chuan hmeichhe pakhat, tui a dil a, chhang pawh min pe rawh a ti a.
Hmeichhia chuan chhang ka nei lo, belah chhangphut tlemte leh sahriak tlemte chauh ka nei, chu chu ka fapa nen kan ei a nga kan thi mai ang a tia.
Mahse, Elija chuan chhang tlemte mi rawn ken la, i fapa nen in ei dawn nia a ti tal a. Elija thu chu a awih a, chhang chu ava pe a, tichuan an chhang neih tlemte leh an hriak tlemte chu a kang thei ta reng reng lo mai a.
Mahse, hmeithainu fapa chu a thi hlauh mai a, a fapa thih thu Elija a hrilh chuan, a fapa awmna lam chu Elijan ava pan a.
Pathian hnenah hmeithainu fapa nun lehna turin a dil a, Pathianin Elija dilna chu a chhang a, naupang chu a tinung leh ta a ni. (I Lalte 17) Tam pawh chu, hmeithainu chhungkua te chuan an paltlang ve ta a ni.
Hmeithainu khan awm lo khawpin thu a awih a, chumi avang chuan an chhungkuain tam an paltlang mai pawh a ni lo, tam laiin nidanga an ei ang pangngai reng an ei chhuah zak phah a ni. Tin, a fapa thi tawh pawh a dam leh phah a, chhungkua damte in an awm phah ta a ni.
Keini pawh hi kan chhungkua kan dam chhuah nan hian awm lo khawpa tawngtai a ngai thin a. Chu chauh a ni lova, awm lo khawpa inngaihtlawmte, dawhtheihte, kohhran inkhawm leh chhung inkhawm ngaih pawimawhte a ngai thin.
Kristian chhungkua dam dap mai kan hmuh thinte hi awm lo khawpa lo tawngtaite, awm lo khawpa inkhawmte an ni fo thin. Kristian chhungkaw nghet em em neitu mipakhat phei chu an thiante nena chaw an eikhawm lai a haw ru a, ava inkhawm a, hetiang taka miin an lo beih avang hian an chhungkua an lo dam thin a ni.
Awm lo khawpa nun fimkhurte hi an ding chhuak duh a, awm lo khawpa rinawmte hi an khawsak tinuam thei tur khawpa ring ngamtu an tawng thin. Awm lo khawpa invawng thianghlimte hian kawppui tha an hmu thin a, awm lo khawpa thawk nasa te hi an hlawhtling thin.
Awm lo khawpa Pathian tana inpe te hi Lalpan a hmang thin a, awm lo khawpa hun hmang fimkhurte hian hun hman an thiama, an dinchhuah phah thin. Awm lo khawpa Pathian hnena dil thintute hian an dil hlawhtling thin a. Awm lo khawpa Lalpa tihtute chu Lalpan a humhim thin a, a malsawm hmaih ngailo a ni.
Hawh u, awm lo khawpin Lalpa tih ang u, tichuan ani'n kan nun zawng zawng a rem fel vek ang.
(Hmeithai hian Elija thu alawm a awi, Pathian thu a ni hleinem kan ti maithei a, mahse an hun lai khan zawlneite kha Pathian leh mihring inkara palai an nih avangin Pathianin a ngaipawimawh em em a, an thu hi a ngaih pawimawh sak thin a, zawlneite pawh hian Pathian thu nena inmil lo chu an sawi ngai lo bawk a ni. Mi thenkhat chuan Elija leh hmeithai inkar hi la kawiin, rawngbawltu thenkhat chu an lo pathian biak ve thina, hei hi tih loh tawp tur a ni.
Tunlaiah chuan, kan zawlnei a thu kan awi tur chu kan bible thu hi a ni.)
(Tawngtai Dan Tur)
Lalpa, miin awm lo an tih khawpa nangmah ka tih phawt che chuan, nangin engtik lai mahin min ensan lo ang a, ka duh zawngte tha i tih ang zelin min pek hmaih lo ang tih hi hre reng chunga nangmah tih bang ngai lo mi ka nih theih nan min pui ang che, Amen. Ti ang aw.
Comments
Post a Comment