"LALPAN in a sak loh chuan, A satute chuan an thawk rim thlawn mai a ni: LALPAN khawpui a vawn that loh chuan, A vengtu chu a meng thlawn mai a ni." (Sam 127:1)
Bible a kan hmuh ang hian, Lalpa nen kan tih loh chuan, kan hma lakna engkim hi a thlawn mai thin a ni. Hei vang hian "Lalpa i thu thu ni rawhse" ti chunga kawppui kan zawn hi a pawimawh a ni.
Kawppui kan zawnnaah hian tu pawh hian kan sual vang pawh ni lovin, Pathian hi dah hmasaka "Lalpa i thu thu ni rawh se," tih nachang hi kan hre lo thin a ni.
A hmasa berah kan hmel duh zawng kan han zawng phawt a, a dawtah kan nungchang duhzawng kan han zawng leh a, a dawtah kan dinhmun (class) duhzawng kan han zawng leh a, tichuan a tawpah kan duh te chu tihlawhtling turin Pathian hnenah kan tawngtai chauh thin a ni.
Kei mahni duhna chauh kan ngaih pawimawh avang hian a tawp a tawpah chuan, kan beidawnga, "Nupui pasal neih ka hun tawh, duh zawng ang diak diak tumah an awm hleinem" tiin mahni leh mahni kan inhmin a. Tichuan, hmin lutuk lovin nupui pasal kan han nei ve rawih ta thin a. Kum hnih khat te chu inhmangaih ber awm angin kan la awm thei mai a, hun a lo kal zela nupa kar a buai ruai tan a, midangin an hriat kan hlau bawk si. Heng hunah hian mi thenkhat chuan, nupui pasal nei chungin an nupa kara an lungawina an hmuh loh avangin ngaihzawng an neih phah thin a ni.
Pathian chuan, personality (nungchang leh thinlung ) en a phal a ni. Sum leh pai, hmel that dan te pawh en a phal lo a ni chuang lova, mahse a ngai pawimawh ber lem lo. I Samuela 16:7 ah chuan, "A hmel lam emaw, a san lam emaw en suh;.. LALPA erawh chuan thinlung lam a en zawk thin a ni," tiin a in ziak a. Chu mai bakah Ruthi leh Boaza chungchangah pawh khan, Ruthi 3:10 "Tlangval rethei emaw, hausa emaw, i zui loh danah hian a tir ai mahin a hnu lamah hian thatna i tilang nasa ta zawk a" tiin Boaza hian Ruthi hnenah a sawi a. Boaza hian, Ruthi hi a lo chhui chiang hle a ni. Pathian pawhin kan kawppui tura kan duh te chik taka kan chhui chian hi a phal a, chutia kan chhui chiannaah chuan a make-up tel lovin a hmeltha tho em tih lam kan en a pawimawh lova, a THINLUNG a tha em tih zawk chu kan en a, "Thinlung dik, Lalpa tih mi kan zawn hmuh a pawimawh a ni."
Boaza chuan Ruthi thinlung that zia chu a hmu ta a. Ruthi chu pasal thih san nuthlawi rethei bawk si , hnamdang a la ni leh nghal ka nei duhlo reng reng a ti lova, a thinlung thatna avang chuan Boaza chuan Ruthi chu a nei ta a ni. Chu bakah Ruthi pawh hi nuthlawi ni chungin, rethei chungin, hnamdang nichungin a thinlung dikna leh thatna avanga khawkhat pa hausa leh pa rawn hip bet thei a ni bawk a ni.
Thinlung thatna avanga mi hip thei tur khawpin thinlung dik put tum ila, chu bakah Boaza ang hian status (nihna) en lovin kan kawppui tur atan chuan "Thinlung dik pumi chauh" i zawng ang u.
Kawpui kan zawnna a, Ruthi leh Boaza anga kan awm ve theih na tur chuan "Lalpa I Thu Thu Ni Rawh se " ti chunga kawppui kan zawn a ngai a ni.
Lalpa i thu thu ni rawh se kan tih loh avangin alawm last seen kan check chhen, a duh duh a bia ang a, a duh chen chen a mu ang chu, kan inkar hi chu "Lalpa Thu Zawk A Ni" ti thei ila chuan kan hahdam ni mai tur. Ka message a seen renga min reply lo emaw, a online renga ka call a pick-up duh lo emaw, min call back loh emaw vangte a kan buai kan buaina hi a reh tur.
Sual hian mahni min indah pawimawh tirin, mahni hma min sial tira (self centeredness), chu chuan min ti hrehawm a ni. Keimah ni duh dan ai chuan Pathian duh dan hi dah pawimawh ila tichuan hahdam takin kawppui kan nei thei zawk ang a. Chu bakah kan inneih hnuah pawh chhungkaw hahdam "Kristian Chhungkua" ngei mai chu kan nei thei zawk dawn a ni.
Kan thian nu pakhat, Pathian nena inpawhna tha tak nei chuan vawikhat chu Valentine's Day ah hian min rawn bia a, "Kum 37 ka ni tawh a, vawiin ni thlenga single a hman hi a hrehawm ka ti ve khawp mai" a rawn ti a. A pasal tura a rin a bialpa nen an lo inthen bawk nen. Tichuan, Pathian that zia te kan sawi dun a, chutah chuan he tawngkam mawi em em mai, tun thlenga ka theihnghilh theih loh a rawn sawi chhuak a, "Lalpa'n Min Pek Tur A Hria A, Min Pek Hun Tur Pawh A Hria" a ti a, hei hi ala pangngai reng a ti a ni. Lalpa'n a pek tur chu a lo hre khawp mai, a hnu lawkah pasal tha tak a nei a, Kristian chhungkaw dik takah a lawi ta a ni.
Kan hriatthiam tawh loh hnu leh hrehawm kan tih ber lai pawha, "Lalpa I Thu Thu Ni Rawh Se, Nangin Min Pek Tur I Hria A, Min Pek Hun Tur Pawh I Hria A Ni" kan tih ngat chuan, kan Lalpa Van Lal Thutthlenga Thu Khi kan tan a chet duh ava rinawm em.
Comments
Post a Comment