"LALPA nghaktute erawh chuan an chakna chu an siam tha leh ang a; mupuite angin thlain an thlawk chho vang a; hah lovin an tlan ang a; chau lovin kein an kal ang."(Isaia 40:31)
Pathian kan nghaka, kan beiseia, tawngtaiin kan dil a, mi thenkhat chuan a kum a kum pawh kan dil tawh a, a chang chuan Pathian kan nghah chhan leh kan beisei chan min tih hlawhtlin sak sela kan tihte chu, kan dawn hun tur kan mit thlaa, kan vuan lai leh kan kuah laite pawh kan mit thla thin ang, kan dil a zirin. Chutia vawi tamtak kan mitthlaa kan hmuh hnuah pawh chuan kan la nei si lo, kan dilna leh amah kan nghah chhanchu min la tihhlawhtlin sak bawk si lo. A chang chuan Pathian beisei tlattu nih hi a natin a na a ni tiro! Beisei lo law law ila, ti tute pawh an awm thin a ni.
Mahse, hei hi ka hrilh duh che "Beisei Tlat Rawh" tih hi.
Lalpa i beisei chhung chu, i beisei chhan tihthlawhtlin sak tur chein i nunah a thawk zel ang. Lalpa laka i beisei a bo vaih chuan, sualin nasa taka a nghaisak theihna tur chein, kawng i hawn sak tihna a ni thei.
Harsa leh na ti chung chunga Lalpa i beisei lui tlat a nih chuan, amah beiseina nun chu i zirchhuak a nga. Beiseina nun zirchhuakte chuan, na miah loin leh hah miah loin Pathian an beisei thiam tawh thin a ni.
Pathian beiseia nghak fan fan tute hi Lalpan a ngaihthah ngai hauh loa, amah an beisei zel theih nan an chakna siam thar sak zel thin a ni. Hei hi a fiah nan he tiang zawng hian han sawi ta ila i pianthar tirh a, Pathian i rinna leh i beiseina kha, kum sawm i pianthar hnua i rinna leh i beiseina nen han teh chhin teh leh, kum sawm i pianthar hnua i rinna leh i beiseina chu nasa takin alo thang tawh tih i hmu ang.
Kan sawi tum tak chu, amah beiseia kan nghah hmasak ber ni atang hian, nasa zawka amah kan beisei theihna turin, kan chakna min lo siamthat sak reng tawh thin alo ni.
Pathian hi amah ringtute rin dan leh an beisei dan anga thawk thin Pathian a nia, amah nasa taka ringtu tan chuan nasa takin a thawhsak thina, amah ring mang lo tan erawh a thawhsak ngai lem lo ti ila kan sawi sual awm lo e.
Min nghah tir chhan
1) Kan Pathian hian, nasa lehzuala kan nuna hna a thawh theihna tur hian, amaha kan rinna hi than tir a duh avangin, kan duh hunah hian kan duhna te min tihhlawhtlin sak loh a thlang zawk thin a.
2) A chang chuan, a hnena kan dilte chu tha taka kan neiha kan enkawl theihna turin, nungchang tha zawk leh amah nena inpawhna thukzawk kan neih nan min nghah tir bawk thina.
3) Chu mai bakah, kawng tha zawk leh thil tha zawk min kawhhmuh a duh avang pawhin min nghah tir bawk thin a ni.
Rawngbawltu pakhat kum 20 chuang Pathian nghah bang duh lotu chuan he tiang hian a ti, "Pathianin la nghak tura min tih chuan, nghah a tha zawk tihna a ni mai" a ti. He rawngbawltu hian Pathian a nghah rei tawh em avangin, Pathian zia a hre thiam tawha, Pathian nen inkungkaina pawh an nei thuk hle tih a hriat a. He rawngbawltu hian Pathian chu mi zawng zawng ai a finga, ro a rel sual dawn lo tih hi a hriaa, a ring ngam a ni.
Pathian kan nghah lai hian, "Pathian hi a tha a ni" tih hi hre reng ang u. Kan ngaihtuahnain a phak loh thiltha zawng zawng min pe duhtu Pathian a ni sia. Luka 11:11 ah chuan "Nangniho zinga pa hi, a fapain chhangper dil sela, tunge lung pe ang? a nih leh, sangha dil sela, tunge sangha aiah rul pe ang?" tiin alo inziaka, mihring pawhin fate hnena thil tha pek nachang kan hriat chuan vana kan Pa khian amah beiseitute hnenah chuan thiltha pek ava hmaih dawn lo em. Pathian kan beisei avangin kan nun a harsa zo vek taa ngaite an awm thina, hei hi thil dik lo hul hual a ni, Pathian kan beisei ngai loh lutuk avangin, Pathian kan beiseia kan rilru a han fim chiah hian kan dinhmun lo chhiat zia kan hmu thiam mai alo ni zawk thin.
Kan Pathian hi beiseiin i nghak tlat ang u, chu chu kan vanin kalkawng a ni sia.
Comments
Post a Comment