THUHRILTU 12:1
I vânglai hian i siamtu chu hre reng ang che, Hun ṭha lo, tarchhiat hun, ‘Dam pawh nuam ka ti tawh lo,’ i tih hma hian.
Ṭhalaite harsatna hi engtiang chiaha nasa nge tih hriat tuma research beitute chuan an thil hmuhchhuah avangin hlauhthawnna nasa tak an nei a, an research na report an pekah pawh ‘Code Blue’ tiin a hming an vuah a.
‘Code blue’ chu damdawiin thil daih a ni a. Damlo na tak, thi mai tawh tura dinhmun derthawng taka awmte an dahna ‘ICU’ kan tih ang hi a ni. Researcher te chuan ṭhalaite dinhmun an zirchianna aṭanga an beisei sân lohzia leh ṭhalaite dam khawchhuahna chance tlêmzia an sawi nân he hming ‘Code blue’ hi an hmang a ni.
Zoram ṭhalaite dinhmun pawh hi zirchiang ve ta ila, he report ang hi kan neih ve tho a rinawm? Hetia kan lan dân aṭang ringawt pawh hian ṭhangtharte hian chhanchhuaktu an mamawh tih a lang reng tawh a ni.
Kohhran tinin ṭhalai pâwl rau tak kan nei chung hian kan bulah kan ṭhalaipuite an tlu phung mai si a. Ṭhalaite zînga rawngbâwlna hi tun ai nasa lehzuala kan kalpui a ngai tawh takzet a ni.
Ṭhalaite zînga rawngbâwlna hi a pawimawh êm êm a, ṭhalai tam tak boralna tuipuia tla lut zawih zawihte chhanchhuak tûr hian kan tlai a va hlauhawm em.
Ṭhalaite hi ram leh hnam nghahfâk an ni a, chutih rual chuan hun lo kal zêl tura Kohhran bân la ni zêl tûr an ni a, an pawimawh hlê a ni. Kan ram ṭhalaite hian Kohhran huang chhûngah leh pâwnah harsatna nasa tak an tawng mêk a, Pathian tih chakna dîla ṭawngṭaipui an ngai takzet a ni.
Bible a kan hmuh angin ṭhalaite hmangin nasa takin Pathian a inpuang ṭhin a nih kha.
Comments
Post a Comment