Kan chenna hi Khawvel ngang a ni a, thihnain a tlawh loh chhungkua pawh kan awm ãwm lo ve. Kan hmangaih leh kan duh ngawih ngawihte nen kan inthen zel mai chu a nia. A va lungchhiatthlak thin tak em! Ngaiin thlahlel êm êmin kan inthen a, mittui sur zung zung chungin kan inthlah liam thin a nih hi.
Thlahlel hle mah ila hemi khawvelah hian kan intawng tawh dawn si lo va, kan khua a har ngawih ngawih mai zawng a nih hi maw! Kan chettlatna hmun apiangah kan mitin (awm ta lo chu) a zawng ru reng a, kan bula awm turin kan suangtuah bawk a, anih loh leh khawi atangin emaw min lo thlir reng niin kan hria a, kan tap a, kan tah laiin min hnem turin kan beisei thin.
Mahse chung kan beiseina leh suangtuahna zawng zawng chu a thâmral leh thin si! Kan hnenah an rawn kir theih tawh loh avangin keimahni zawk chu an hnena kal ve chakin kan kûr kan kûr mai zawng anih hi.
Chuti tak chuan khawvelah hi chuan beisei bo takin kan awm thin ti rawh u, An thiante kan hmuhin min thlamuan viau mahse an ai awh zo reng reng kan hmu mawlh si lo! Lalpa bawk kan ngai leh thin a nih hi!
A nih leh kan mi duh kaltate chu engtinnge an awm kan hre duh em le? Duh teh reng mai. Anmahni chanchin kan hriattheih dawn phawt chuan kan tih theih zawng zawng tih kan huam ang chu!
Chuti anih chuan kûn mai lo teh ang u. Thlan hi chu a thûk zawh poh leh a thim mai a nia. Chunglam i'n thlir teh ang. Chutah chuan chiang takin kan hmu thei a ni.
Kan hmangaih kal tate chu anmahni hmangaiha thisena leitu Isua Krista hnenah chuan rinna maia an lo thlir thin chu fiah tak leh chiang taka hmuin an thleng tawh zawk a, Kan hmangaihnain a tehkhin phak rual loh hmangaihnain Isua Krista chuan a lo kuangkuah tawh a ni.
Chung mite chu Puan var sintir an ni a.
Chu puan var chuan engnge a entir le?
Puan var chuan "Hnehna" chu a entir a ni. Isua a thawhleh khan puan var mi enkhalh thei sinin a inlar asin. Kan tana thawhhma hruaitu, thihna hneha tholeha ngei chuan thihna a hneh tih entirnana a lo sin tawh ang chu a lo sintir ve ta!
Chung mite chu natna leh hrehawmna te, thihna meuh pawhin a ngam ve tawh lo! An tan chuan thihna chu a thi ve ta! Halleluiah! An thi leh dawn tawh lova, nâ reng rengin a tibuai tawh lo va, an ril a tam dawn tawh lo va, an tui a hal tawh hek lo va, lum leh sa reng rengin a tihrehawm ve tawh lo asin.
Tin, Puan var chuan "Thianghlimna" chu a entir a. Khawvel sualna leh bawlhhlawhnate'n a tibuai pha ve tawh lo va, sual leh bawlhhlawh chu a rim a rã pawh an hre tawh lo va, setana thiltihtheihna reng rengin harsatna a siam phak tawh hek lo.! Thianghlim famkimin an leng tawh zawk a ni.
Beramno thisenin an puante suk fai a ni tawh avangin Pathian thianghlimna hmaah chuan tihthatfamkimin an awm ta. Lalpa chu fakin awm rawh se.
Tin, Puan var chuan, "Lawmna," / "Hlimna" a entir bawk.
He khawvel hi chu lungawilohna khawvel a ni a, a changin lawm ve thin mah ila, a tukah kan lungngai leh thin. Kan lawm a, kan thinur leh thin a ni si a. Kan hmangaih kaltate erawh chu an mahni thisena leitu kiangah an awm tawh a, lawmna famkima chhunkhahin an awm tawh zawk asin.
Hlain, "Min ngai lovin an leng ram thianghlimah,
Kir an rel lo an kal zel e;
Lei hi hnuchhawn ram a lo ni... " a tih ang khan hlimin an leng tawh zawk asin.
Chutichuan, he leiah hian inngai leh inthlahlel takin kan inthen ngei mai. Kan khawsaknate chu a dang ta si, Aw, en teh, an nun a dang ta, chu ram ropui han thlengte chu,...chutiangin kan inhmu thei tawh lo chu nia. Mahse anmahni nen kan inzawm tlat reng theihna leh kan lendunpui reng theihna tur kawngkhat a awm e.
Chu chu Isua Krista chu a ni. Anmahni Isua bula an awm ang takin keini pawh Isua hnenah awm tlat ila, Isua Krista chuan anni nen min thlunzawm tlat dawn a, he lungngaihna khawvelah hian thlamuanna tharin chhun khah kan ni ang a, mittui karah lawmna, mittui karah thihna hnehna, mittui karah thlamuanna thuruk chu min pe ngei ang.
Issac Hc Laltlanhlua
Jehova - Jire
Comments
Post a Comment