Valentine’s Day lo thleng tura puala Kansas City Star in Zawhna leh Chhanna February 8 khan an buatsaih a, khawvel evangelist lar, Billy Graham (93) chuan zawhna an zawh hote chu a chhang a. Nula leh tlangvalte chu an kawppui tur dik tak hre turin Pathianah chauh innghat turin a ti.
Nula pakhat zawhna?
‘Ka bialpa chu a ‘perfect’ lo tih ka pha lo. Mahse; ka nei duh a nih phawt chuan a zu in te sima hna tha tak thawh tur a ngaihtuah tur thu min hrilh a. Ka nu leh paten chu chu an ring duh lo. Engvanga ring duh lo nge an niha engtin nge chu chu thudik lo a ni tih an hriat bik? Kei chuan ka bialpa hian min hmangaih vanga hetianga sawi hi niin ka ring hmiah si a’, tih chu Billy Graham chuan Thufingte 2:12 thu, ” “Sual kawng ata chhanchhuak tur che leh, Thil awihawm lo sawi mite laka chhanchhuak tur chein,” tih thu hmanga chhangin mipa tupawhin hmeichhia hmangaih a neih chuan a nuna sual leh thiltha lo a tih thinte chu ‘tunah’ a simin a thlak danglam nghal tur a ni, ‘nakinah’ tih chu thil awihawm loh, rintlak loh a ni fo thin a ti.
Billy chuan a sawi zelnaah, ‘Nupaa insiam tawh, an inngaihzawn laia a mipain, ‘ka sim ang,’ a tih an inneih hnua a sim leh tak loh vanga buaina tam tak tawkten tanpui tura min sawmna lehkhathawn chhiarsenloh (countless letters) ka dawng tawh. Chung hote chuan an inneih vang maia mipain a thil tha lo tihte a sim phah lohzia an hmu a, a simna chhan tur pawh an hriat kher loh thu an sawi leh hnuhnawh thin a ni. Hetiang mipa tam tak hi an inneihna thutiamah an rinawm ngai lo. Bible in hmangaihna chungchanga min zirtir, “Hmangaihnain a dawhthei a, ngil a nei bawk thin; hmangaihnain a itsik lova….a che mawi lo lova, mahnin hma a sial lo va, a thinur duh lo va, sual lamah a ngaihtuah lo va,” (I Kor.13:4-5) tih hi an hlamchhiah thin a ni,’ a ti.
‘Pathian hian a hmangaih che a, i tana tha ber tur a duh a, i mamawh engkim a hria. Kawng dik lo chu zawh suh la, ‘nakinah’ tia thlemna lakah inthiarfihlim la, zawh chhin lul suh. Chu ai chuan Isua lam pan la, i hmalam hun tur atan thiltha a lo ngaihtuahsak dawn che nia. I bialpain Isua a mamawhzia hriain kawhhmuh la, Isua a hnar a nih chuan tlansan ngam rawh. Pathianin kawng min kawhhmuh hi kawng dik, hlima leh chatuana nunna a ni a, chumi kawnga hruai thei tur che i thlang dawn nia,’
‘Pathianin a fapa mal neihchhun nunna hial hlana a hmangihna che a lantir avang hian i ‘hlu’ em em a ni tih hre reng ang che. I nunna atan tlan chhuak rawh, kha kawngah khan hlimna a awm lo. I phak ang tawktea tawngtaiin Pathian rawn la, i sualte thupha chawiin i thinlunga lal ber turin sawm rawh. Chu chuan nunna thar, chatuana nunna leh hlimna a pe dawn che a ni,’ a ti.
Comments
Post a Comment