Ka manganin LALPA chu ka ko thin a, Ka Pathian ka au thin. Ani chuan a biak in atang chuan ka aw a hria a. A hmaa ka au thawm chu abengah a lût ta a. (Sam 8:6 )
Pathian hian a mite hrehawma kan awm hi a hmu a, a hria a, min ngaihsak loh vang ni lovin, min hmuin min hre reng mahse, kawng engkim hi min tihsak a tum lo. Kan tana tha tur tawk min pe a, kan phu tawk chawimawina min khum tir mai a lo ni. Pathian laka vui thinte reng reng hian Pathian hi chhiahlawh enin an en thin tlangpui. Duh duh hunah an ko a, an lungngaih mangan laitein an au thin a, mahse, an hlim lainite hian an theihnghilh leh si thin.
Chu mihringte inang lo tak mai mize hrechiang em emtu amah Pathian bawk a nih vangin kan phu tawkin thil min tihsak zawk a lo ni. Mihringte chu luhlul tak leh rilru bulbai nei lo tak mai hi kan ni a, tawngtainaa kan dil zawng zawngte hi min pe vek ta se, A petu zawk chu kan theihnghilh leh thuai dawn a, chu tluka kan tana nun khawhar chu a awm dawn loh vangin, chu nun chu kan tawh a phal lova, Pathian zawkin kan tana tha turin ro min rel sak thin.
Hla siamtu chuan, " Lal Isua kan thiantha berin, kan manganlaiin min lawm" tiin a lo sawi a. Mihringte ngaihtuah dan atang chuan " kan mangan laiin min pui" ti se a awm ang ve viau tho ang. Mahse chu chu he hla hian a sawi tum ber a ni tlat lo. Kan mangannah hian Lalpa hmel hliah thintu kha a kiang thin a, Lalpa hmel chiang takin kan hmu chauh thin vang a ni. Kan nawm leh kan hlim lai nite hian Pathian kan lo theihnghilh fo thin a, lawmna chang reng kan hre thin lo. Lawmna chang hriat loh pawh hi Lalpa theihnghilh kan lo ni der tawh a ni. Engkim chunga rorela chungleng savate chawm a, leia mihringte kawng engkima min ngaihtuah sak fo thintu a nihna kan lo hre tawh thin loh vang ani.
Chuvang chuan Lalpan kan manganna hi a lawm changte pawh a awm thin. A thu hrimah khawvelah hian hlim reng tura inngaihna hi bumna lian ber a ni a, tumah hlim reng thei kan awm lo. HLim ni a awm a, tah ni pawh a awm bawk tur a ni. Thil tha dawn chang a awm a, thil kha dawn changte pawh kan nei bawk tur a ni. Joba hian chiang kekkawkin min lo hrilh a, "Lalpa hnen ata thil tha kan hmu a, thil tha lo pawh kan hmu lovang em ni"? tiin. Thuhriltu pawhin, " phun hun a awm a, pawh phawi hun a awm" a lo ti ve bawk.
Lalpa hmel min hliah thei thil tam tak a awm a, chungte chu a zavai thuin sawi thei lo mahila, kan neih engkim hian Lalpa hmel min hliah thei tiin kan sawi chuan a fiah viau awm e. Pathian hmel hmu thei lo tura min hliah tirtu chu setana a ni a, setana chuan kan thil neihte hmang hian Lalpa hmel kan hmuh loh nan min lo bei fo thin. Tunlai khawvel milin han sawi dawn ta ila, internet hi mitin hman a ni a, a lar em em bawk. Hmang lo leh khawih lote chu mi tunlai lo nih an hlawh tawh. A chhan chu tunlai tunlaina hian mitin mai hi min chim hneh em vang a ni. Internet hi thil tha tak a ni a, thil tha lo tak pawh a ni thei. Amah ngawr ngawr a tha lo emaw tha emaw tiin kan sawi lo va, a phenah khan a hmangtu mi pakhat setana a awm thin vang hian, chu setana zia chu hrethiam a, kan nun leh kan hun kan hmang thiam erawh a ngai dawn hle a ni. I thil neih engkim mai hi setana chuan a rawn hmang thin a, a hun a zir leh a hmun a zirin a thil hmante pawh a thlak thin. Mahse engtiang pawhin a thil hman dana rawn thlak mahse, nang ringtu chuan i hrethiam ngei tur a ni. I tana tha loa i hriatte chu i hnawl phal bawk tur a ni. Chutilozawngin, chu i thil neih chuan hmangtu a neih avangin i nun tichhetu a lo ni thuai ang.
Chuvangin mihringte tan chuan engmah neih loh hi a lo him ber mai tiin han sawi dawn ta ila, tam tak chu a dik thei awm e.
Mahse, a bulpui ber chuan thil engmah hmang lo pawhin min bei thei tho a ni. A chhan chu thilung chhungril ngaihtuahna atanga lo chhuak a nih vangin. Chu thinlungah chuan min bei thin a, min beihdan ang angin kan che chhuak mai thin a lo ni. Chu thinlung chu bum hmang ber, chhe leilet der a ni a tuma hriatthiam theih pawh a ni lo.
Retheih pachhiat hi sawi mawi kan tum lo, sawi mawi engang mahila sawi mawi viau theih pawh a ni hran lo. Rethei chu rethei a ni tlat vangin. Rethei chu hausa kan va tithei chuang lova, sawi mawi tum poh leh a theih lohzia a fiah tulh tulh mai a ni.
Kan sawi tum ber chu, i nun leh i chan tawkah khan lungawi la tih hi a ni. Lungawi zel hi a lo nuam ber a, a hahdam thlak ber bawk. I lungawiloh viau khan awmzia a va nei thui lem lo va, mahni in hremna mai a ni. Lalpa hnenah thil kan dil a, kan dil tur pawh a ni reng a, mahse kan tana tha lo tur chu Lalpan directin min paihbo sak nghal mai thin. Kan tawngtaina chhanin a awm lo kan tih fo thenkhatte hi chu kan tana tha lo tur min hnawl sakte an ni. Chuvangin Lalpa hnenah i thlen tawh phawt chu Lalpan alo record vek a, lo buai vak vak duh suh, i buai viau khan engmah a sawt chuang lo. Lalpa aw chu nghak tawp mai rawh. Lalpan a hria a, Lalpan a ngaihtuah ang che. Nimahsela hlimna i dil a, harsatnain a bawm che a nih chuan Lalpaah tho tlan lut ang che. I him ngei ngei ang tih hi ka tiam a che. Lalpaa tlan luhna chang hriat loh chuan kan nun hi beidawnnatein a lo khat leh mai thin. Lalpan i tawngtaina kha a hria a, i dil loh dan deuha a chhang che anih pawhin i tana tha ber turah pawm la, Lalpaah chakna thar i nei zel anga, Lalpa mitlung i lo ni ang a, a malsawmna chhiarsen loh khawpin a vur hun che a lo la thleng thuai ang. Malsawmna chauh umtu chuan hmuh inbeisei suh se, mihringte mahin hmangaihna lem kan hriathiam chuan Pathian chuan mitin thinlung a enfiah thin a, a hriat loh ring lo la, Lalpaah hmangaihnin intlulut la, amahah chuan nung la, a ni pawh i tan a nung reng dawn a ni. I harsatnate kha haw tawh lo la, Lalpa aw hriat nan hmang tawh ang che. Lalpan malsawm che rawh se
Comments
Post a Comment